Cabesantenan di scol den programa di “International School Leadership”
Na October 2015 a inicia cu e prome grupo di cabesante- y directornan di scol cu a sigui e curso di “International School Leadership” den cual ta pone esunnan cu ta encabesa un scol hunto pa por empodera nan cu instrumentonan necesario pa por cambia rumbo di nos enseñansa.
 |
Ta trata aki di area di desaroyo profesional pa nos educadornan.
Hopi biaha e cursonan sa ta hopi general, pa gruponan mas grandi, manera na October durante Luna di Enseñansa cu a brinda cantidad di curso y tayernan riba tur tipo di tema of disciplina den enseñansa. “Esaki ta hopi mas specifico pa esunnan cu ta director, director adhunto of cabesante di scolnan, cu manera ta conoci, tin necesidadnan hopi mas specifico y mas enfoca riba cierto puntonan den nos enseñansa compara cu cosnan mas general”, asina Minister Michelle Hooyboer-Winklaar a duna di conoce durante un entrevista despues di a atende apertura di e curso di “International School Leadership” (I.S.L.). |
A cuminsa aña pasa cu un grupo di profesionalnan di Ontario Principals’ Council cu ta representa mas cu 5000 cabesante di scolnan na Canada. Nan ta brinda e cursonan aki na diferente parti di mundo. Nan meta ta pa engrandece enseñansa rond mundo, pa cual Aruba sin duda tambe kier ta parti di dje.
E grupo atendiendo e curso awor aki ta e prome grupo di October aña pasa, cu awor ta siguiendo cu e resto di e modulenan y e di dos grupo cu a cuminsa cu e prome curso. Na final di tur e 6 modulenan, e cursista lo ricibi su certificado special.
Den un sala a yena 30 participante cu ta continuando cu e di dos parti y den e otro sala un otro 30 docente cu ta apenas iniciando e curso special aki.
Varios di e docentenan participando a bisa cu e curso a cambia nan perspectiva completamente y cu tin varios cosnan cu awor nan ta trahando riba dje cu ta positivo. Tin plannan pa nan scolnan unda nan kier mira mehoracionnan y cu awor cu nan ta traha hunto cu otro scolnan locual antes no tabata e caso, sin duda ta dunando bentaha.
 |
“Nos ta hopi contento cu nan ta bek awe cu nos. E curso intensivo aki lo sigui durante 4 dia largo y mi ta spera di scucha na final cu tur cos a bay bon y cu e lidernan di nos scolnan a siña hopi”, asina Minister Michelle Hooyboer-Winklaar a enfatisa. E ta spera cu den transcurso di e aña aki ainda e cursonan lo continua, pa prepara e cabesantenan.
Info / Contact
Pa mas informacion por busca den e alfabet menu riba homepage: [M] Ministerio di Enseñansa
Scroll To Top
