Ayudo financiero extra pa aña escolar 2019-2020
Den luna di september tur persona cu ta den bijstand y cu ta bay scol, tin e posibilidad di haya un ayudo financiero extra. Esaki ta wordo paga un biaha so y ta consisti di dos parti: (1) ‘Schooluitkering’ y (2) ‘Ouderlijke bijdrage’.
Ken ta bin na remarca?
Tur mayor y yiu(nan) cu ta ricibi un bijstand normal of un persona cu ta cobra bijstand di persona cu limitacion (guns), cu ta entre 4 te cu 24 aña y cu ta bayendo scol regular durante dia. Cu scol regular kiermen scolnan preparatorio (kleuterschool), scolnan durante dia y Scol Duna un Man. E yiunan mester ta bibando cerca e mayornan concerni y tambe mester ta ricibiendo bijstand.
Schooluitkering
E ‘schooluitkering’ ta un ayudo pa yuda cubri gastonan di scol y ta consisti di un suma di
AWG 220,- pa cada persona den bijstand cu ta bay scol te cu un maximo di AWG 800,- pa famia. E ‘schooluitkering’ ta wordo paga hunto cu e pago regular di bijstand den luna di september esta diasabra 7 di september 2019.
Ouderlijk bijdrage
E ‘ouderlijke bijdrage’ ta un ayudo pa yuda cubri e “contribucion di mayor” na scol y ta consisti di un suma di maximo di AWG 120,- pa cada mucha/persona. Mester tene na cuenta cu si e suma di “contribucion di mayor” na e scol ta mas halto cu AWG 120,-, e mayor mes mester paga e diferencia. E ‘ouderlijke bijdrage’ ta wordo paga directamente na e scol.
Rekisitonan
Pa por haya e ayudo financiero extra pa e aña escolar 2019/2020 mester cumpli cu e siguiente rekisitonan.
- E mayor mester busca entrante 15 di augustus 2019 e formulario di Departamento di Asunto Social na e scol di e yiu(nan).
- E mayor mester yena e formulario aki completo y bon.
- E mayor mester trece e formulario yena hunto cu e carnet di bijstand na oficina di Departamento di Asunto Social prome cu diabierna 30 di augustus 2019, e orario ta di 8:00 pa 11:30 y di 1:00 pa 4:00.
Por entrega e formulario na oficina di Departamento di Asunto Social na San Nicolaas solamente entre 15 te cu 23 di augustus 2019, despues por entrega e formulario solamente na Departamento di Asunto Social Oranjestad durante e orario menciona.
Importante
Tene bon na cuenta cu si no entrega e formulario di scol prome cu diabierna 30 di augustus 2019, esaki lo trece diferente consecuencia cu ne.
- E bijstand lo baha.
- E bijstand di luna di september lo wordo blokia.
- No lo ricibi e ‘kindertoelage’ mensual di AWG 250,- pa yiu(nan) entre 3 cu 24 aña cu ta bay scol, te ora presenta cu e formulario di scol (ora e wordo adapta, e ta sosode sin forsa retroactivo ‘(terugwerkende kracht)’.
- Ta perde e derecho di e ayudo financiero extra di ‘schooluitkering’ pa e aña escolar 2019/2020.
- Ta perde e derecho di e ayudo financiero extra di ‘ouderlijke bijdrage’ pa e aña escolar 2019/2020.
Tene na cuenta
Si bo ta un persona riba 24 aña cu ta cobra bijstand y bo ta bay scol regular durante dia manera entre otro IPA of Universidad di Aruba (UA), por fabor trece e formulario di DAS prome cu dia 30 di augustus na DAS. Tambe un famia cu ta cobra bijstand y tin yiu(nan) cu no ta cobra bijstand pero si ta bay scol, mester trece e formulario di DAS di nan yiu(nan) prome cu dia 30 di augustus na DAS.
Departamento di Asunto Social ta pidi tur persona concerni pa tene bon cuenta cu e rekisitonan y cumpli cu esakinan den e tempo stipula. Di e forma aki ta evita cualkier situacion menos agradabel den luna di september 2019.
Aki por download e flyer di DAS:
Pa mas informacion of pregunta por semper tuma contacto cu DAS su seccion Guia Social na telefon 528-1100. Tambe DAS ta invita bo pa ‘like’ su pagina di facebook “Departamento di Asunto Social” pa haya hopi ‘tools’ valioso riba tereno social.
Info / Contact
Pa mas informacion por busca den e alfabet menu riba homepage [S] Subsidio pa mayor of por tuma contacto cu Departamento di Asunto Social.
Scroll To Top
