Atardi Informativo Studentenkamer 2024
E alumnonan di voorexamenklas y examenklas ta invita pa un atardi informativo diaranson 25 di october na The Movies na Gloria.
En conexion cu e proyecto di Studentenkamer, Minister Endy Croes ta bishitando diferente scol secundario na Aruba pa invita e alumnonan di voorexamenklas y examenklas pa un atardi di informacion.
Diamars mainta, Mandatario di Enseñansa a bishita Mon Plaisir College Havo & Vwo na Dakota. Mandatario di Enseñansa tabatin e oportunidad pa combersa un rato cu e studianten alabes a invita e studiantenan di examenklas cu ta desea pa continua cu nan estudio na Hulanda pa un atardi dedica na nan.
E sesion informativo aki ta tuma luga diaranson awo, 25 di october 2023 na The Movies na Gloria. Esaki ta di dos (2) aña consecutivo cu ta organisa e proyecto aki. Durante e sesion informativo lo tin diferente profesional cu lo brinda informacion di, entre otro, alohamento (huisvesting) na Hulanda. Arubahuis y Departamento di Enseñansa di Aruba lo ta presente pa contesta pregunta relaciona cu estudio na Hulanda. Ademas, lo tin un presentacion di Sra. Paloma Osorio di Fundacion Plan di Bida pa educa e alumnonan tocante maneho di presupuesto y “Realign Coaching, Consultancy & Services” di Sra. Liseanne Sambo – Gomez cu lo trata e topiconan: escogencia di estudio y con pa yena e formularionan.
Minister Croes a indica cu e meta di e sesion informativo aki, ta pa yuda y motiva e alumnonan inscribi pa camber na tempo, mirando cu si bo no tin un vivienda na Hulanda, e studiante no por haya un BSN nummer y consecuentemente no por habri un cuenta na banco y/of no por inscribi pa scol. Minister Croes a indica cu esaki ta un problema grandi pa e studiantenan cu ta continua cu nan estudio na Hulanda.
Minister Croes kier evita pa e studiantenan pasa den e proceso aki y cu esaki perhudica nan estudio na Hulanda. Pa conclui, Minister Croes ta gradici Sra. Richelle Noël, docente- y alumnonan pa e caluroso recepcion, y ta invita e alumnonan mas un (1) mayor diaranson awo, 25 di october pa un atardi di informacion.
