Arubahuis a ricibi alumnonan di ISA
Den Haag – Recientemente Arubahuis a ricibi un grupo di alumno y docente di International School of Aruba (ISA) cu tabata na Hulanda pa un viahe di estudio y orientacion.
 |
| Potretnan cortesia di Arubahuis |
E grupo a bin Hulanda pa bishita diferente instituto pa enseñansa superior y pa orienta riba opcionnan di estudio na Hulanda. International School of Aruba a aserca Arubahuis pa inclui un bishita como parti di nan programa. Arubahuis a percura pa un programa extenso cu a inclui informacion y interaccion.
Minister Plenipotenciario Guillfred Besaril hunto cu representante di Aruba na Union Europeo Eddy Paris y directeur interino di Arubahuis mr. Glenn Ling a yama e grupo bon bini y a dirigi algun palabra na e grupo di alumno y docente.
Despues di e recepcion a sigui cu e programa cu a wordo coordina door di Afdeling Onderwijszaken di Arubahuis. E afdeling a percura pa un presentacion cu a inclui entre otro e historia y tareanan di Arubahuis y di e afdeling encarga cu asuntonan educacional, informacion di Arubalening relevante pa esnan cu ta biba na Aruba y tin nacionalidad Hulandes, como tambe informacion y algun dato actual y interesante riba studia na Hulanda.
E programa a sigui cu un rondleiding completo door di e edificio di Arubahuis unda cu a ilustra diferente detaye di historia. Na final e grupo a wordo ricibi door di ATA Europe cu a duna un presentacion di nan tarea y meta pa promove Aruba den Europa. E tabata un mainta hopi informativo pa e alumnonan y e intencion ta pa sigui inclui Arubahuis den proximo viahenan di orientacion.
 |
Minister Besaril a keda sumamente contento cu e bishita di e grupo y ta spera di por stimula y ricibi mas grupo na Arubahuis di diferente scolnan di Aruba pa bin orienta riba opcionnan di estudio y bida na Hulanda.
Info | Contact
Pa mas informacion por busca den e alfabet menu riba homepage: [Studia na Hulanda] of por tuma contacto cu: [Kabinet van de Gevolmachtigde Minister van Aruba – Arubahuis]
Scroll To Top
