Maestro 2015
Ensenansa Primario
Murielle Brown-Roos | Mon Plaisir
 |
Juffrouw Murielle a lanta den un famia di maestro y for di chikito e tabata yuda na scol. Den su trabou na MetaCare e gana pa traha cu mucha a lanta mas. Su pasion den su trabou ta pa inspira mucha kere den nan mes. Siña nan cu den bida bo por logra si abo mes ke. Su focus den esey ta lesamento: por medio di lesamento e mucha su mundo ta amplia. E ta gusta su trabou y ta hopi pasiona. |
E ta sali for di e punto di bista cu tur mucha kier ta bon mucha y cu mester duna nan atencion personal tur mainta ora nan yega scol.
Juffrouw Murielle ta hopi dedica y ta parse cu e ta biba pa su alumnonan! Juffrouw Murielle ta hopi creativo y ta usa inovacion den su manera di duna les. Un ehempel ta e feria cu e ta organisa tur aña pa su klas. E muchanan tin cu scoge un personahe famoso y internacional pa nan imita. Nan tin cu busca informacion di e personahe aki y pa e dia di feria trata di ta e personahe, tanto den uiterlijk como personalidad. Den e feria tur alumno di scol y otro bishitante por siña conoce e personahenan famoso. Tabatin por ehempel riba Einstein, Neil Armstrong, Elvis Presley, Michelle Obama y e escritor J.K. Rowling. Un programa hopi creativo cu hopi balor educacional: e prome paso di research.
Tambe juffrouw Murielle ta conoci como un bon stagebegeleider pa studiantenan di IPA. Su deseo pa enseñansa na Aruba ta pa pone mas enfasis riba lesamento, tambe for di cas. Mester kita e sistema di AVI pasobra e ta kita e placer di lesa. Y mucha mester tin placer den lesamento.
Enseñansa Secundario
Jose Miguel Donata | Colegio San Nicolas
 |
Meneer Donata ta un maestro ya pa 17 aña caba y ta traha actualmente na Colegio San Nicolas. Su studiantenan ta describi’e como un meneer cu semper ta kla pa yuda nan. Semper bo por aserc’e pa cualkier cos, djis manda un mail. Prome cu les cuminsa e ta puntra su studiantenan con ta bai cu nan. Nan ta sinti cu e ta berdaderamente interesa den nan. E no ta solamente interesa den con nan ta na scol, pero tambe pafo di scol. |
Studiantenan ta indica cu esey ta motiva nan hopi. Nan ta haya su manera di duna les hopi dushi.
E alumnonan ta aprecia cu e no ta duna un punto mas abou cu 5. Meneer Donata tin bon contacto tambe cu e mayornan. E ta purba concientisa nan con nan como mayor por yuda yuda nan yiu bai dilanti.
Su pasion den su trabou ta cu e por transmiti conocemento na e muchanan y cu e ta yuda den e formacion di e mucha. Desaroyo personal di e individuo y e parti civico ta hopi importante pa meneer Donata.
Enseñansa Special
Mary Evelyn Raven | Paso Pa Futuro
 |
Juffrouw Evy a bay studia pa maestro pa motibo cu e no tabatin otro opcion pensa, pero durante e prome aña na APA y durante su prome stage na Colegio Santa Teresita e pasion pa e trabou a lanta. Pa juffrouw Evy un maestro mester tin pasion pa su trabou. Loke e ta gusta mas ta pa wak con e por logra cambia e mente, e smaak di e muchanan. Specialmente ora e logra hinca ambicion den su alumnonan y sende e lus den nan. |
Juffrouw Evy tin un abundancia di pasenshi y perseverencia.
Juffrouw Evy ta conoci tambe pa su creatividad. Tur aña su klas ta masha bunita decora. Na inicio di cada aña escolar e ta bishita cas di su alumnonan pa tin un bon comunicacion cu mayor y alumnonan.
Y ken no conoce juffrouw Evy cu tabata pa hopi aña e cara di Voz-i Landia Escolar? Un voluntario incansabel y un pilar di e evento aki! Juffrouw Evy ta trahando na Scol Paso Pa Futuro.
Enseñansa Superior
Thais Nierop | Universidad di Aruba
 |
Tempo e tabatin 17 aña Juffrouw Thais a bisa su mama cu jamas di su bida e lo bira docente. Juffrouw Thais a studia Tourism Management & International Bussiness y despues di un carera na SVB ela bin end up toch den enseñansa! For di dia prome di augustus 2006 e ta trahando na Universidad di Aruba. Riba su prome dia den enseñansa ela yama su mama y a bis’e: “Mom, I’m home!”. |
E mes ta bisa cu e calling a dura un tiki, pero cu esaki lo tabatin su motibo. Loke e ta gusta mas di su trabou ta “Help students capture their talent”.
E energia cu juffrouw Thais ta hinca den su studiantenan ta algo hopi remarkable. E ta bai the extra mile pa sigura cu e studiantenan ta bond cu otro y pa tin un “vibe” positivo den klas y na e facultad.
Juffrouw Thais tin bon contacto cu su Dean y demas coleganan. E ta un “driving force” pa e facultad caminda e ta traha y pa tur locual ta encera pa haci e facultad un lugar placentero y un lugar innovativo unda tanto alumnonan como docentenan por sigui desaroya nan mes. Juffrouw Thais su deseo ta pa nos por sigura cu nos futuro maestronan ta pasiona.
 |
