Dirigente 2015
Enseñansa Primario
Janine Soliana-Vingal | Colegio Santa Teresita
 |
For di su trabou como maestro y despues IB’er a lanta e interes cerca juffrouw Janine pa bira cabesante di scol y traha na mehoracion di calidad den enseñansa. Juffrouw Janine ta cabesante di Colegio Santa Teresita, un scol piloto di Disciplina Consciente. Su deseo grandi ta pa tur scol na Aruba bira scol di Disciplina Consciente. Juffrouw Janine su drive ta pa crea un scol cu caracter. Su focus ta excelencia y e no ta wak su scol como algo statico. |
Door di esaki mes e ta motiva su coleganan pa sigui desaroya. Den “su” scol tin dinamismo. Den su funcion e ta gusta e parti di coaching: forma y encurasha tanto e mucha y e team di maestro pa cada un di nan por ta un miho hende.
E ta conoci como un persona punctual cu ta eherce su trabou cu hopi amor, un persona hopi corecto y recto tanto cu su team y su alumnonan. Semper e ta pone tur pensa riba nan actonan y riba e consecuencianan cu esaki por tin. E ta pone su maestronan refleciona riba nan desicionnan y ta guia nan dor di laga nan mes yega na nan contesta. E ta stimula y guia su maestronan segun un plan pa nan por ta miho maestro y pa asina mehora e calidad di enseñansa.
Enseñansa Secundario
Frank Mulders | Avond HAVO San Nicolas
 |
Meneer Mulders ta ya pa 3 aña adjunct directeur di Avond Havo. Su coleganan ta describi’e como un persona hopi dedica cu ta tuma tempo pa scucha su alumnonan y cu ta corigi unda mester. Semper e tin tempo tambe pa scucha su coleganan y tur otro personal na scol. El a siña con pa bira un lider. Despues di tabata docente di Hulandes pa hopi aña el a laga su vak pa un job cu no tur ora ta wordo aprecia, principalmente ora mester corigi docente of alumno. |
Pero e tin e charisma pa na un manera hopi nice mustra kico a bay menos bon. E ta honesto y hopi diplomatico y den situacionnan di conflicto e no ta perde cabes. Semper e ta tene su mes na palabracion den directie y ta yuda unda cu e por pa e scol por cana bon.
Meneer Mulders ta gusta su trabou, principalmente paso como miembro di directiva e por logra haci mas pa e scol por cana bon pa e alumnonan, y e alumno ta central pa Mulders. Riba e pregunta pa su pasion den su trabou meneer Mulders a contesta: “Je kan niet een beetje zwanger zijn. Je gaat er vol voor of niet. En het gaat om de leerlingen”.
Meneer Mulders ta hay’e hopi importante pa scucha e alumnonan, duna nan atencion y laga nan sinti nan mes na cas ora nan ta na scol. Esaki e ta considera particularmente importante ora ta trata di alumnonan cu ta haya un di dos oportunidad den enseñansa (“tweede kans leerlingen”) y alumnonan di “Avond Onderwijs”.
Avond Havo lo haya su falta como cu aki un par di luna e lo yega edad di pensioen.
Enseñansa Special
Joselyne Oduber | Emmaschool
 |
Juffrouw Joselyne ta trahando 35 aña caba den enseñansa y ta cabesante na Emmaschool caminda e ta guia un team di 53 persona. Su passion den su trabou ta e muchanan, pa kom tegemoet na tur necesidad di cada mucha. Juffrouw Joselyne tin hopi pasenshi cu un curason grandi cu por hinca su mes den e otro: e mucha, su mayor y e maestro. |
Juffrouw Joselyne sa nomber di cada mucha di su scol y semper e ta keda wak e parti positivo cu tin den un alumno.
Su team ta hay’e un bon coach cu semper ta atento, kla pa yuda y cu realmente ta scucha. Como cabesante e ta push su trahadornan pa bay e extra mile. E ta inverti tempo den nan y ta tene nan altanto di tur desaroyo den enseñansa.
Algun di su deseonan pa nos enseñansa ta pa nos keda focus riba enseñansa di calidad, enseñansa cu no ta focus solamente riba e proceso, pero caminda e mucha mester por gosa. E no kier pa niun porta cera pa e muchanan special. Su soño grandi ta un scol inclusivo.
Enseñansa Superior
Glenn Godijn | Academy of Fine Arts & Design Aruba
 |
Meneer Glenn Godijn ta un urban designer cu a bini Aruba na 2010 pa yuda cu embeyesemento di Oranjestad y rebiba centro di ciudad. Actualmente e ta director y docente na Academy of Fine Arts & Design Aruba cu ta ofrece studiantenan un vooropleiding y actualmente ta desaroyando e bachelor opleiding. Desde comienso meneer Godijn tabata envolvi den e set-up di e scol. E mes tin un background artistico y no tur ora tabata facil pa carga e responsabilidad di un director. |
Apesar di esaki y apesar di hopi contratiempo meneer Godijn a sa di sigui padilanti.
Su perseverancia y positivismo tabata un contribucion grandi den establece e Academy na Aruba.
Teamwork ta hopi importante pe. E ta purba trece un “klik” entre e docentenan local y Hulandes Europeo p’asina nan forma un team cu ta traha den beneficio di e studiantenan. Tambe e ta haci su maximo esfuerso pa busca un mix di studiante internacional y local pa por tin intercambio cultural y artistico den e opleiding.
Meneer Godijn ta organisa diferente tayer pa hubentud en general di Aruba y tambe ta organisa diferente exposicion pa e studiantenan haya oportunidad pa tin intercambio cu publico.
Scroll To Top
