Actor di Sosten 2015
Enseñansa Primario
Saskia Elgin-Maclean | Pius X School
 |
Juffrouw Saskia despues di a traha como maestro a bay pa un reto nobo y asina awor ta trahando como Intern Begeleider (IB’er) di Pius X School. Juffrouw Saskia a studia logopedie tambe y esey ta yud’e hopi den su trabou. E ta gusta comparti su conocemento pa asina henter e team di scol por yuda e muchanan miho. P’e ta importante pa un IB’er ta riba un liña cu su cabesante y pa e tin un overview completo di e scol. |
Su punto di salida ta: “Mi ta yuda bo pa bo wak cu bo tin e tools pa yuda e mucha”. E ta pone hopi enfasis riba lezen na scol y ta traha cu leesmoeder na Pius X School. Bou di su coleganan e ta conoci como un persona hopi organisa, dedica, positivo y hopi lief cu e muchanan.
Semper e ta para kla pa su coleganan y ta purba yuda nan lo miho posibel. Juffrouw Saskia ta desaroya su mes den su trabou entre otro dor di sigui cursonan online y dor di forma parti de un network di IB’ers: “Leerkrachten in de driverseat”.
Enseñansa Secundario
Ingrid van der Linden | EPB San Nicolas
 |
Juffrouw Ingrid ta trahando 40 aña den enseñansa na Aruba di cual 15 aña como Intern Begeleider (IB’er). E ta IB’er na EPB San Nicolas. Den su trabou e ta haya sumamente importante pa siña e alumno enfrenta bida ni maske con duro bida por ta. Mester laga e alumnonan sinti cu nan ta conta, cu tin hende ta kere den nan. Mester traha riba nan confiansa propio. For di eynan bo ta lanta un mucha su animo y e ora ey bo por sigui traha cune. |
Juffrouw Ingrid semper ta dispuesto pa yuda su coleganan. Semper ela keda studia. Banda di su diploma di maestro scol basico, remedial teacher y tweede graads Papiamento e tin hopi certificado di tur e cursonan y workshops cu el a sigui.
Juffrouw Ingrid ta desea miho resultado den enseñansa. E ta di opinion cu mucha no por keda sinta. E ta haya cu tur hende mester yega na nan “trekken” y por tin nan opleiding caba.
Enseñansa Special
Joally Lake | Emmaschool
 |
Juffrouw Joally ta trahando 4 aña den enseñansa na Aruba como klassenassistent na Emmaschool. E ta un klassenassistent mara na alumno y e aña aki di un alumno autista. Semper su deseo tabata pa traha cu mucha special. E ta gusta su trabou y ta bin tur dia trabou cu hopi gana di traha. |
Su pasion ta e muchanan y e band cu e ta cera cu cada mucha. Den su trabou e ta haci uzo di Disciplina Consciente, un metodo cu e ta gusta hopi.
E tin curason pa su alumnonan y ta zacht den su asercamento loke ta trece rust cerca e alumnonan.
Juffrouw Joally su deseo grandi ta pa Aruba por yega na un “Mythylschool” (scol adapta na muchanan cu un handicap) cu diferente specialismonan manera por ehempel un “muziektherapeut”.
Un otro deseo cu e tin ta pa crea un programa di prevencion pa muchanan cu no mester drenta Emmaschool. E ta briya ora e ta papia di su trabou y tambe ora e ta papia di “su” muchanan den team di futbol den Dakota.
Scroll To Top
