Acuerdo cu Carleton University
Recientemente Minister di Enseñansa Michelle Hooyboer-Winklaar a logra formalisa un acuerdo importante cu Carleton University di Ottawa, Canada. E acuerdo aki ta e di 5 acuerdo cu ta keda formalisa entre pais Aruba y un instituto di enseñansa superior na Canada.
 |
E acuerdo aki ta habri porta pa varios intercambio entre Aruba y Carleton University, asina tambe dunando nos studiantenan mihor acceso na un estudio di calidad halto. E ceremonia di e firmamento di e acuerdo a sosode via medionan digital entre Minister di Enseñansa di Aruba y e Vice Presidente di e Universidad pero e occacion a conoce un aspecto hopi special mirando e hecho cu tabata tin un delegacion di enseñansa di Aruba riba un viahe di trabou na Ottawa cu a logra presencia e momento importante aki.
 |
Minister Hooyboer-Winklaar ta sumamente contento cu un parti importante di e acuerdo ta cu studiantenan di Aruba lo por cualifica pa un scholarship di entre $1000,- y $4000,- dollar Canades pa aña, cu ta reduci e tuition fee cu studiantenan internacional ta paga.
E scholarship pa aña ta aplicabel pa tur studiante di VWO of HAVO di Aruba cu ta cumpli cu e normanan di admission y normanan pa cualifica pa e scholarship na Carleton University.
Un di e criterianan di mas importante pa por cualifica pa e scholarship ta e resultadonan di scol secundario. Mas halto e average di e studiante na sea VWO of HAVO, mas halto e suma di e scholarship ta bira pa cual e studiante por cualifica pe.
 |
Importante pa menciona ta cu e acuerdo ta encera cu pa e scholarship e Universidad lo considera e top 6 vaknan di scol secundario, dependiendo di e estudio cu a aplica pe.
E gastonan di estudio na Canada ta conoci pa ta relativamente mas abou cu na Merca y tambe e balor di e dolar Canades ta mas rasonabel cu e dollar Mericano si compara esaki cu nos florin. Manera menciona Carleton University ta situa den e capital di Canada esta Ottawa, cu ta wordo considera un di e cuidadnan mas safe pa biba cu un calidad di bida sumamente halto. Mirando e localidad di Carleton University un studiante facilmente por viaha y conoce e resto di Canada. |
Algo cu tambe ta haci Canada y specialmente Carleton University atractivo ta cu un studiante internacional por traha te na un maximo di 20 ora pa siman banda di su estudio y ora di finalisa e estudio tin posibilidad di traha te na un maximo di 3 aña na Canada pa gana experencia.
 |
Minister Hooyboer-Winklaar ta sumamente contento cu un otro logro mas na beneficio di nos studiantenan di Aruba. “Nos ta creando mas opcion pa nos hobennan di Aruba, algo cu tin un necesidad y demanda grandi pe. Gobierno tin un compromiso cu nos hobennan pa sigui explora mas opcion y yuda habri porta cu posibilidadnan positivo pa Aruba” e titular di enseñansa a conclui.
| [Mas informacion di e acuerdo cu Carleton University] |
Website
 |
Website: [carleton.ca]
Info | Contact
Pa mas informacion por busca den e alfabet menu riba homepage: [S] Studia na Canada of por tuma contacto cu DEA seccion Studiefaciliteiten.
