Apertura di edificio nobo pa Scol Basico Prinses Amalia

August 18, 2017

Scol basico Prinses Amalia a habri su porta p’e aña escolar nobo na nan edificio nobo, unda cu a tene un apertura den presencia di Minister di Enseñansa, Michelle Hooyboer-Winklaar hunto cu alumno y mayornan.

Durante e discurso di Minister di Enseñansa, Michelle Hooyboer-Winklaar y di Minister Richard Arends, kende tambe a hiba palabra, a desea e alumno y maestronan hopi exito pa e aña escolar 2017-2018.

Minister Hooyboer-Winklaar a entrega e yabi di scol na e cabesante di Prinses Amalia Basisschool, estaRoelien Kock-Hofman, kende tabata feliz di a ricibi esaki.

Durante e apertura Minister Hooyboer-Winklaar hunto cu Minister Richard Arends, Roelien Kock-Hofman y 2 studiante di scol a corta e cinta pa asina tur alumno, maestro y mayornan por a drenta den e edificio nobo pa inicia e aña escolar nobo.

Minister Hooyboer-Winklaar a pasa den algun klas y a desea tanto alumno como maestronan hopi exito den e aña escolar nobo. E tabata sumamente contento cu e apertura cu e scol a prepara pa asina duna tur hende bon bini na e edificio nobo.

Tur hende tabata yena cu emocion y alegria y tabata impresiona con bunita e scol a keda, mientras cu e muchanan tabata ansioso pa cuminsa siña den e edificio nobo di nan scol ubica na Seroe Blanco, banda di Colegio EPI.

Pa e ocasion special aki a canta himno di Aruba. E cabesante Roelien Kock-Hofman a gradici Zulaika Geermany Ivan Quandus pa composita y aregla e himno di scol. Durante e ceremonia di apertura, un grupo di mucha a canta y baila e himno di scol y despues a baila un di dos cantica. Tabata algo hopi bunita pa mira ora e muchanan a invita e maestronan y cabesante pa baila.

Tambe a probecha e ocasion pa conta algo di e historia di e scol unda cu na 2011 a cuminsa cu e e scol. Tambe cu 2 biaha Prinses Amalia a termina na di 4 luga den competencia di Mente Inteligente y ta e prome scol cu a bira campeon 2 biaha.

“Prinses Amalia ta un scol cu a logra hopi caba desde nan inicio na aña 2011 apesar di ta den un edificio no completamente optimal. Pero nan a demostra cu un scol ta mas cu solamente su edificio. Exito di un scol ta su atencion pa cada studiante, ta maestronan cu ta colabora cu otro, ta un cabesante cu ta lidera su team na un forma humilde y inspirativo, ta un scol cu mayornan ta envolvi y cu tur hende ta comparti e pensamento cu tur mucha tin potencial.” Minister Hooyboer-Winklaar a declara durante e apertura.

“Pa nos e ta bunita pa mira un apertura cu tabata envolvi asina hopi studiante”, el a expresa. Tur hende kisas tabatin un tiki nervio ariba e prome dia di scol, pero esaki no tabata e caso cu e alumnonan di Prinses Amalia di cual Minister Hooyboer-Winklaar no a nota esaki.

E muchanan tabatin e entusiasmo pa cuminsa scol y esey ta loke Ministerio di Enseñansa kier pa tur scol. Na Aruba tin un total di 83 scol di cual e vision y meta mester ta asina. Hopi di e scolnan aki a ricibi un “upgrading” den e ultimo 8 añanan, pero ainda tin algun scol unda cu nan infrastructura no ta optimal. E ta keda un reto pasobra ta papiando di 83 scol y hopi di nan a keda construi 50 pa 60 aña pasa. Pero a lo largo e meta mester bira cu keda cu cada scol riba nan mes lo ricibi e renobacionnan necesario pa asina brinda un calidad di enseñansa cu nos ta desea.

“Mi ta hopi satisfecho pa mira un scol excepcional ricibi un edificio excepcional. Mi ta sigur cu loke nan lo bay logra awo tambe ta excepcional.” Minister Hooyboer-Winklaar a remarca.

Cabesante Roelien Kock-Hofman

Roelien Kock-Hofman cabesante di Prinses Amalia Basisschool a splica cu na aña 2015 Minister di Enseñansa a informa nan cu nan lo haya nan propio edificio y lo por sali for di unda nan tabata ubica banda di ELMAR na playa. Aña pasa a haci e groundbreaking y conform e planning, awe e scol ta cla pa ricibi mas cu 300 studiantenan.

E cabesante a expresa cu e tabata hopi emociona y cu e acto di apertura tabata hopi bunita. A aprecia e presencia di e mandatarionan. E muchanan tabata hopi emociona y entusiasma, el a bisa. “Nos ta hopi contento cu awe oficialmente nos por haci uzo di nos scol. Mi ta hopi contento y orguyoso cu e muchanan tabata emociona cu nan scol”, el a duna di conoce.

Un par di dia prome cu scol a inicia, tabatin muchanan cu a pasa na e scol pa mira den cua klas nan ta. Tabatin mucha cu no kier a bay cas, el a corda cu un sonrisa. “Juffrouw nos por haya les di biaha“, nan tabata bisa.

Na e prome dia di scol tabatin maestro cu mester ta AO, pero asina mes no kier a perde e esaki. El a presenta pa asina ta hunto cu su colega y alumnonan pa inicia e aña escolar den nan bunita edificio. E emocionnan cerca e maestronan tambe ta hopi halto.

Juffrouw Marie-Thérèse Croes

Juffrouw Marie Thérèse Croes, a bisa sa cu esaki tabata un dia hopi emocional pa un y tur, paso un edificio nobo ta trece hopi alegria.“Pa mi esaki ta extra alegria pasobra na nos scol bieu mi tabata den un trailer y awo mi tin un klas cu mi mes por drecha y haci e esfera bunita pa e muchanan”, juffrouw Croes a bisa.

Juffrouw Croes a indica cu el a ricibi tambe hopi ayudo di su famia pa por a prepara su klas pe aña escolar nobo. El a agrega cu ta spera e aña aki cuminsa cu hopi energia y siñando y poniendo enfoke riba e lesnan. Banda di esaki no mester lubida e cosnan leuk cu ta haci cu e muchanan pa asina nan keda cu gana pa bin scol, e docente a remarca.