Biahe di Studiantenan pa Hulanda
Den transcurso di e siman nos dilanti mas cu 200 studiante lo ta rumbo pa Hulanda pa inicia nan periodo di estudio na HBO of WO.
![]() |
Manera ta custumber, Departamento di Enseñansa Aruba (DEA) ta yuda organisa e biahe aki pa studiantenan por medio di un ticket di biahe. E cantidad di ticket cu ta wordo reserva ta a base di un “schatting” na momento cu resultado di graduacion ta wordo finalisa. Historicamente studiantenan ta bula riba varios fecha segun disponibilidad di cupo riba e buelonan. Departamento di Enseñansa Aruba (DEA) seccion Studiefaciliteiten ayera anochi dia 26 di juli a constata cu no a ricibi for di e agencia di biahe y KLM 20 ticket di 20 studiante. Ta trata aki di 20 studiante cu a cumpli na tempo cu tur rekisito pa por bin na remarca pa un ticket di biahe, y a purba di ubica nan hunto cu e otro 180 studiante biahando dia 31 di juli. |
Esaki a sosode despues cu DEA ayera atardi a publica un anuncio riba su website y Facebook page cu a caba di ricibi e tickets di biahe pa Hulanda for di e agencia di biahe, y cu e studiantenan cu a cumpli na tempo cu tur rekisito pa por bin na remarca pa un lening reisticket, lo por pasa busca nan ticket.
DEA den onderhandeling cu e agencia di biahe, a trata na logra pa e 20 studiantenan aki forma parti di un buelo cu tambe lo tin como fecha di yegada na Amsterdam dia 1 di augustus proximo. Sinembargo e agencia di biahe a informa na DEA cu no tin mas luga.
Inmediatamente, ayera anochi ainda, DEA a busca contacto via telefon cu e 20 studiantenan aki pa splica nan di e situacion cu a surgi. Mester remarca cu na e momento ey e seccion no a logra di haya contacto cu 5 di e 20 studiantenan aki.
DEA a comunica na e studiantenan cu lo sigui onderhandel cu e agencia di biahe y lo informa e studiantenan mas pronto cu ta posibel pa ki fecha nan lo tin reserva.
E peticion di DEA na e agencia di biahe ta pa acomoda e grupo di 20 studiante aki hunto riba un solo vuelo. Tur cos ta keda sinembargo na e disponibilidad.
Nos ta lamenta cualkier inconveniencia cu e cambio di fecha aki por causa pa tanto e studiante, su mayornan, e mentoren y POC’s. DEA lo keda den contacto cu tur esnan concerni pa comunica tur informacion necesario.
Update
Departamento di Enseñansa Aruba (DEA) ta informa cu a sigui negocia cu e agencia di biahe y airlines y cu na e momento aki e 20 studiantenan tambe ta hayando un ticket di biahe pa Hulanda.
Diabierna mainta, dia 28 di juli, e studiantenan lo por pasa busca e ticket na seccion Studiefaciliteiten ubica na Cumana cuminsando for di 10 or y lo por duna asina mas informacion di e fecha y number di vuelo. Entretanto diahuebs atardi e informacion aki a keda comunica (via email) na esnan concerni, esta e studiantenan en cuestion, como tambe Arubahuis.
Departamento di Enseñansa ta gradici e studiantenan y particularmente e mayornan cu a mustra comprension pa e situacion cu a surgi. Ta gradici tambe e grupo di studiante cu a brinda sugerencianan constructivo cu a yuda nos a yega na solucionnan concreto pa tur 209 studiante cu ta bin na remarca pa un lening reisticket.
Mas informacion
- Ta sugeri pa studiantenan acudi regularmente na nos website ea.aw como tambe sigui Departamento di Enseñansa riba facebook na @educationaruba pa tur informacion.
- Pa mas informacion di e procedura di aplicacion, e overeenkomst Arubalening y di e diferente deadlines: [Financiamento | Arubalening]
- Pa e FAQ’s relaciona cu e verklaring, overeekomst y uitbetaling Arubalening: [FAQ Arubalening 2017]
Info / Contact
Pa mas informacion por busca den e alfabet menu riba homepage: [A] Arubalening of [S] Studia na Hulanda of por tuma contacto cu DEA | Studiafaciliteiten (Arubalening)
Scroll To Top