Hopi interes pa e GED program
International School of Aruba recientemente a tene un anochi di informacion pa comparti detayenan relaciona cu e programa General Education Development (GED) cu nan lo ofrece pero tambe e opcionnan cu e graduado tin pa sigui despues pa un programa di enseñansa superior.
 |
Ministerio di Enseñansa, bou guia di Minister Michelle Hooyboer-Winklaar, recientemente a anuncia cu e programa na e idioma Ingles cu ta resulta den un credential certificate ekivalente na high school, esta GED, lo wordo financia pa medio di e ministerio aki.
E programa ta encera un minimo di 16 siman di preparacion, cual ta tuma luga na Internacional School of Aruba (ISA), cu a bira un di e 20 centronan global autorisa pa ofrece e programa di preparacion. ISA ta e unico centro den nos region, y den Reino Hulandes cu e autorisacion aki.
Recientemente a organisa un anochi di informacion pa comparti detayenan di e programa en general, pero tambe e opcionnan cu e graduado tin pa sigui despues pa un programa di enseñansa superior.
Minister Hooyboer-Winklaar ta hopi contento di por ofrece un opcion mas na adultonan di 17 aña of mas, cu sea tabatin of tin dificultad cu e idioma Hulandes, cu ta buscando progreso den nan carera, of cu e sistema di enseñansa di un forma of otro no tabata un bon “match” pa nan y nan no a logra e meta cu nan kier.
E unico inversion cu e studiante tin cu e GED program ta e examengeld cual ta mas of menos US$ 145 y su compromiso y esfuerso pa logra. Tin cupo pa un maximo di 80 studiante cada biaha cu e programa wordo ofreci. E prome programa ta cuminsa na augustus 2017.
Modules
E programa, segun Leigh Ann van der Heyden a splica, ta consisti di cuater materia y modulo. Van der Heyden, kende ta e college counselor y GED coordinator na ISA, a comenta cu GED ta crea un caminda pa studiantenan cu kier sigui un enseñansa avansa, sea na Merca, Canada, na Aruba mes of otro pais cu ta reconoce e GED.
 |
E examen ta consisti di cuater test, y pa cada uno lo ofrece un module. “Reading, language and arts“ ta e parti di dominio di e idioma Ingles, unda cu e studiante ta wordo prepara y getest pa cu habilidad di lesamento y analisis di texto, su skirbimento y argumentacionnan basa riba e textonan ofreci.
“Mathematics reasoning“ ta test e studiante pa cu e aplicacion practico di rekenen/wiskunde, manera algebra y conocemento general di e materia cu ta wordo aplica den bida diario, y loke scolnan di enseñansa superior ta rekeri.
E di tres modulo, “Science“ ta encera conocemento general di e materianan relaciona na ciencia, y ta inclui ciencia fisico, ciencia di mundo y di bida.
E ultimo materia ta “History“, den cual ta revisa e conocemento di e studiante pa cu economia, gobierno y historia, como tambe historia Mericano, y geografia.
Van der Heyden a agrega cu docentenan cualifica ta revisa tur informacion di cada materia cu e studiantenan, incluyendo historia Mericano, y e studiantenan lo ta cla y bon ekipa pa logra nan GED na final di e curso.
Minister Hooyboer-Winklaar a subraya cu e curso aki ta wordo ofreci cu e meta principal pa tin un opcion mas, un oportunidad mas pa asisti tur e personanan cu no a logra of ta logrando nan metanan di estudio y educacion.
 |
Xaui Thijsen ta un hoben di 16 aña kende a gradua di MAVO y actualmente ta den klas HL1 na HAVO. El a bisa cu el a logra na MAVO y no ta bayendo malo na HAVO, pero e ta sinti mas afinidad pa Ingles. E ta haya cu su dominio di Ingles ta miho, e tin e vaknan exacto, y no ta mira un problema cu eseynan tampoco, loke e ta prepara pa siña ta e traduccion di e palabranan cu e mester sa den materianan manera biologia, y ta spera cu ta wordo acepta den e prome programa di GED. |
 |
Stenson Tromp actualmente ta atendiendo Avond-HAVO, y e tambe ta aplicando pa e GED program. El a haya e informacion hopi bon, como cu casi tur su preguntanan cu ya el a haci online a wordo contesta.
Tromp ta mira mas leu cu su caso so, pero tambe e personanan cu lo kier logra finalisa nan High School cu ta yuda nan pa bay dilanti y no tin tres pa cuater ora pa anochi pa dedica pa un tempo largo na un estudio manera Avond-HAVO. El a remarca cu esaki por ta e miho opcion pa e persona cu ta trahando, pa esun tin e soño cu e no por a realisa pasobra e sistema cu a custumbra cune pa decadanan largo na Aruba simplemente no a funciona p’e. Pa su mes Stenson ta mira e GED un opcion pa e logra bay dilanti mas lihe y mas efectivo. |
E anochi di informacion tabata hopi exitoso, y desde e momento cu a anuncia e opcion aki e reaccion di comunidad tabata lihe y cu entusiasmo. Tabatin, segun e mandatario, un avalancha di pregunta pa mas informacion y ya tin 80 persona registra pa e prome tanda di e programa. Ta premira cu lo mester cuminsa acepta aplicacionnan pa e di dos tanda asina cu e prome cuminsa na augustus.
Minister Hooyboer-Winklaar a conclui bisando cu e ta hopi contento cu e nivel di cursonan cu ISA lo ofrece, como un “authorized GED partner“, creando un opcion cu sigur ta bay crea oportunidadnan hopi valioso pa nos studiantenan y adultonan cu ta buscando un chens pa ta exitoso den enseñansa, y pa sigui padilanti den nan profesion y carera.
Requirements
E edad minimo pa aplica pa e GED program ta 17 aña y mester tin nacionalidad Hulandes of prueba di residencia na Aruba pa un minimo di 5 aña.
Tur studiante cu aplica mester mustra suficiente “English Proficiency”. Lo test esaki na comienso di e programa unda cu lo ofrece tambe un programa di guia.
Mas informacion
 |
Internacional School of Aruba (ISA) a desaroya un website unda cu tur informacion di e GED program ta wordo publica: [gedaruba.com]. Tur interesado por registra via di e website pa keda na altura di tur informacion y updates.
