Arubahuis positivo riba articulo tocante seguro medico
Den Haag – Gabinete di Aruba na Hulanda (Arubahuis) a tuma nota di un articulo di e plataforma Fuente tocante e seguro medico pa studiantenan Arubiano na Hulanda. Arubahuis ta positivo cu e bista critico di Fuente, sinembargo kier aclarea y corigi algun punto.
 |
| Articulo di Fuente “Insure to Study: the Pros and Cons”: [Nosfuente.org] |
Un bon iniciativa di Fuente pa scirbi un articulo dunando splicacion riba e pro y contra di Insure to Study. Tambe pa duna splicacion kico ta e diferencia entre e seguro basico cu ta obligatorio pa residentenan Hulandes y e seguro internacional cu ta conta pa e studiante Arubiano.
Den e articulo a bin dilanti pakico e seguro aki ta necesario. Tur studiante cu ta bin studia cu un Arubalening ta firma un contract den cual ta stipula cu Gabinete di Aruba (Arubahuis) ta zorg pa un seguro medico pa nan. Esaki ta algo cu e studiante a firma pe y ta pa protecion di e studiante!
Zorgtoeslag
Un punto cu semper ta keda bin den discusion tocante e seguro medico, ta e “zorgtoeslag”. E metodo di e “zorgtoeslag” ta uno cu na momento cu bo aplica pe, bo ta ricibi e “zorgtoeslag”, pero ta despues di un aña Belastingdienst ta stipula si berdaderamente bo tabata tin derecho pa haya “zorgtoeslag”.
Belastingdienst ta controla si e persona tabata traha / stage na Hulanda y si a paga belasting riba e entrada cu e ta ricibi. Na momento cu Belastingdienst stipula cu bo no tin derecho riba e “zorgtoeslag”, bo lo mester paga esaki bek.
Arubahuis den pasado a haya diferente caso di studiante cu a haya nan mes den problemanan financiero pa motibo di e “zorgtoeslag” aki, debi cu nan mester a paga esaki bek. Pa es motibo ey Arubahuis ta bisa tur studiante cu no ta traha of stage y ta ricibi un entrada pa cual e mester paga belasting riba dje, pa NO pidi “zorgtoeslag”. Si un studiante dicidi di tuma e “zorgtoeslag” toch, esaki ta core pa su mesun risico!
Ley Hulandes
Un otro punto cu a ser treci dilanti den e articulo di Fuente ta e confusion tocante articulo 20 di e “Besluit uitbreiding en beperking kring der verzekerden volksverzekeringen 1999“.
E ley aki ta stipula cu personanan cu ta na Hulanda solamente pa nan estudio y cu ta procedente di Aruba, Corsou, Sint Maarten, Bonaire, Saba y Sint Eustatius, ta ser exclui di e seguro basico. E ley aki por wordo mira como uno discriminatorio pa Arubianonan, siendo cu nan tin nacionalidad Hulandes. Pa con incomprendibel cu esaki por ta, e ta keda un ley Hulandes cual mester respeta.
Restitucion
Pa loke ta trata e diferente kehonan tocante e restitucion di e costo medico, lo siguiente. Desde un principio Arubahuis den combersacion cu Insure to Study y basa riba e kehonan di e studiantenan, a traha duro pa drecha e sistema den cual un studiante ta hay’e confronta cu e situacion cu e mester “schiet voor” e costonan di dokter of botica.
E kehonan cu Arubahuis a ricibi directamente, a ser resolvi. No ta exclui cu ainda tin studiante cu lo por ta haya su mes confronta cu e lo mester “schiet voor” cierto facturanan, mescos cu por pasa cu tur seguro y cu e seguro anteriormente. Si esaki ta e caso, Arubahuis ta pidi pa tuma contacto inmediatamente cu Insure to Study pa nan drecha esaki. Ta door di avisa esaki, nos por sigui mehora e servicio.
Si ta asina, cu por ejempel dentistanan ta manda un factura via Famed pa e studiante, esaki ta un procedura normal pa tur aseguradonan na Hulanda. Na momento cu ricibi e factura, e studiante mester mand’e pa Insure to Study pa nan paga e factura aki, pues no mester “schiet voor”.
Accesibilidad di Insure to Study
Tocante e accesibilidad telefonico di Insure to Study manera discribi den e articulo, ta berdad cu pafo di oranan di oficina Insure to Study no ta alcansabel via nan number di telefoon regular, pero riba e carnet di seguro tin un number di alarm cu e studiante por yama cu ta 24 ora pa dia y shete dia den siman na disposicion di e asegurado.
Dekking
Finalmente mester bisa cu e seguro ta cubri unicamente casonan medico. Un operacion cosmetico cu no tin di haber cu salud, no ta cay bou di e seguro di Insure to Study. Aparte di e cubrimento medico, e seguro via Insure to Study ta cubri: aansprakelijkheids-, repatriërings-, reis- y inboedelverzekering.
Tur studiante por haya informacion di e dekking di e seguro, den e polisvoorwaarden.
Gabinete di Aruba na Hulanda (Arubahuis) ta keda enfatisa cu na tur momento e studiante por contact e Arubahuis den caso di duda of pa pregunta.
Info | Contact
Pa mas informacion por busca den e alfabet menu riba homepage: [Studia na Hulanda] of por tuma contacto cu: [Kabinet van de Gevolmachtigde Minister van Aruba – Arubahuis]
Scroll To Top
