Inversion haci pa tur lider di scol ta ekipa cu habilidad y instrumentonan esencial
Un proceso cu a cuminsa aña pasa lo culmina na luna di maart 2017, ora cu e di cuater y ultimo grupo di lidernan di scol di Aruba ta completa e curso International School Leadership (ISL).
 |
E grupo, cual ta wordo referi na dje como un “cohort”, a cuminsa cu e curso durante di e Luna di Enseñansa cu un total di 31 participante, y ta inclui directornan di scolnan di tur nivel, como tambe sub cabesantenan y lidernan suplente.
Na momento cu e grupo aki caba e curso y ricibi nan certificado na maart, tur lidernan di tur scol lo a completa e curso y ta cera e ciclo di e curso International School Leadership.
Minister di Enseñansa Michelle Hooyboer-Winklaar a splica cu e meta ta pa facilita tur lider den enseñansa, pues tur esunnan cu tin un tarea di responsabilidad pa e scol, cu e curso mundialmente conoci cu ta duna nan e instrumentonan necesario pa mehora e scol en general y e programanan cu e scol tin. Den liñanan grandi, e curso ta dirigi na re-enforsa e rol di e lidernan y cu esaki ta re-enforsa e scolnan.
A conta cu participacion di lidernan di scolnan Preparatorio, Primario, Secundario y Enseñansa Superior. Tur lider mester a presenta un plan como parti di e programa y ta haya un certificado na final. Minister Hooyboer-Winklaar a laga sa cu e ta hopi contento cu por a ofrece e curso aki como parti di e plan nan di su ministerio pa facilita y yuda mehora calidad di enseñansa.
 |
 |
“Ta esencial pa tur esunnan cu ta forma parti di enseñansa ricibi e training nan y instrumentonan necesario pa na final di dia nan tin mas informacion posibel, pa nan tin un impresion di kico otro paisnan ta haci, y pa nan por presenta y ehecuta plannan pa mehoracion di nan klasnan y e scol den su totalidad,” Minister Hooyboer-Winklaar a expresa.
El a agrega cu loke e lidernan a ricibi ta teoria y e instrumentonan practico pa logra yega paso pa paso na e siguiente nivel; despues di completa e curso nan sa kico mester wordi poni na su luga, y kico nan mester haci pa logra nan metanan.
Ministerio di Enseñansa ta contento cu e participacion, y a haya feedback di e otro gruponan cu e curso a haci nan consciente di cierto factornan importante, y a duna nan un otro perspectiva di kico ta realmente posibel na nan scolnan.
Awor cu tur lider a completa e prome 6 modulenan y a wordo certifica den esaki, lo sigui sondea e opcion pa sigui cu e curso mas avansa y posibelmente un “Master Class” na Ontario, Canada pa algun participante.
Info / Contact
Pa mas informacion por busca den e alfabet menu riba homepage: [M] Ministerio di Enseñansa
Scroll To Top
