Ta importante honra tur esunnan cu ta forma nos futuro generacion
E reconocimento “Appel di Oro” ta un expansion di loke tabata conoci te cu aña 2014 como “Maestro di Aña“.
 |
Compara cu e añanan anterior, na 2015 Minister di Enseñansa, Michelle Hooyboer-Winklaar, a haya cu ta hopi importante pa amplia e “award”, agrega mas categoria y mas nivel di enseñansa pa asina duna elogio na tur actor cu tin den enseñansa na Aruba, segun Natasha Anthony ta splica.
No a cambia nada na e proceso di nominacion, unda cu ta invita comunidad den su totalidad pa nomina un persona of proyecto cu ta merece un “Appel di Oro“. Cada nominacion cu wordo ricibi ta wordo evalua, ta presenta un “shortlist” di nominado pa cada categoria y siguientemente ta tuma luga un proceso di evaluacion mas extenso pa determina kende lo ricibi e premio. |
Natasha Anthony a comenta cu tin actualmente seis categoria di premiacion, esta Maestro, Dirigente, Proyecto di Scol, Newcomer of the Year, Actor di Sosten y Lifetime Achievement. Den e categoria Actor di Sosten ta ricibi nominacionnan pa personanan cu ta traha cu e scol(nan) den un funcion unda cu nan ta brinda asistencia pa cu e educacion y/of bienestar general di un klas of henter e scol. E persona aki por ta por ehempel un IB-er, trahado social of klassenassistent. E Lifetime Achievement ta pa honra un persona cu a dedica un gran parti di su bida na enseñansa y e ta sea trahando ainda of a bay cu pensioen.
 |
Natasha Anthony a conclui bisando cu aunke den enseñansa esunnan envolvi tin custumber di traha duro, y nan ta wak nan trabao como un trabao diario, ta asina cu hopi biaha nan no ta realisa con importante y impactante nan trabao ta. P’esey mes ta importante pa honra nan pa nan trabao y no tin nada malo den duna elogio pa e tarea importante di forma e futuro generacionnan y na esunnan cu tin un impacto hopi grandi riba e bida di nos studiantenan.
Info | Contact
Pa mas informacion por busca den e alfabet menu riba homepage: [A] Appel di Oro of por tuma contacto cu: Departamento di Enseñansa Aruba | Ministerio di Enseñansa
Scroll To Top
