Keda sinta?
Minister di Enseñansa (Hooyboer-Winklaar) ta anuncia cu e aña aki ta bay efoca riba reduci of elimina e fenomeno di keda sinta (zittenblijven) pa medio di un proyecto piloto introduci na tur Scol Publico.
Desde aña 2014 Ministerio di Enseñansa a cuminsa acumula datonan di Aruba pa loke ta trata e fenomeno di keda sinta of “zittenblijven”.
A base di cifras y otro informacion ricibi, ta mustra cu e cantidad di studiante cu ta keda sinta ta desproporcionalmente halto compara cu otro paisnan den region y otro paisnan desaroya rond mundo.
UNESCO, OECD y otro instancianan internacional cu ta studia varios aspecto di enseñansa rond mundo ta conclui cu keda sinta pa un mucha ta sumamente traumatico y cu tin efectonan negativo a largo plaso. Cualkier aspecto positivo, esta cu e mucha ta ripiti e mesun stof pa di dos biaha y kizas ta domina e mesun stof mas miho cu prome biaha, toch ta keda algo temporario.
Rapportnan ta mustra cu e rais di e fenomeno aki hopi biaha ta un “cultura” di keda sinta, unda e concepto di ripiti un aña escolar ta bira algo usual den e sistema di enseñansa y ta wordo mira como algo normal apesar di e evidencia cu esaki no ta yuda e mucha ta existoso.
Proyecto Piloto
Mirando esaki, Minister Hooyboer-Winklaar y su team a traha un plan pa ehecuta un proyecto piloto na scolnan publico cu ta resorta bou di Dienst Publieke Scholen (DPS) pa e aña escolar venidero, esta 2016-2017, unda lo elimina mas hopi posibel zittenblijvers den eerste (1ste) klas.
Sinembargo, 3 scol a opta pa implementa e maneho aki prome cu fin di aña escolar 2016. Ta trata aki di Colegio Hilario Angela, Colegio Conrado Coronel y Prinses Amalia Basisschool. Hunto cu DPS, Cabesante, Maestronan di 1ste Klas, Interne Begeleiders (IB’ers) y otro actornan di sosten na e scolnan a traha hunto pa implementa e maneho nobo.
E resultado final a demostra cu for di 130 alumno den 1ste klas, 11 alumno lo a keda sinta (8%). Cu implementacion di e maneho aki, 1 studiante lo ripiti e 1ste klas.
E proyecto piloto pa e scolnan aki ta wordo mira como un exito y ta duna informacion pa loke ta trata e condicionnan cu mester ta na luga pa e maneho aki wordo introduci na otro scolnan e aña escolar nos dilanti.
“Esaki ta un bon comienso y mi ta contento pa mira hopi enthusiasmo pa e maneho nobo aki. Ainda ta rekeri e di dos parti di e plan, esta e guia necessario den 2de klas pa e studiantenan aki sigui desaroya conform e normanan stipula, pero tambe tackle e asunto aki pa muchanan cu ta keda sinta den otro klasnan den basisschool“, Minister Hooyboer-Winklaar a splica. “Nos ta convenci cu reduci e cantidad di studiante cu ta keda sinta door di sigura cu e instrumentonan y condicionnan necesario ta den man di scolnan, lo tin un beneficio enorme pa nos studiatenan y pa enseñansa en general“.
Info / Contact
Pa mas informacion por busca den e alfabet menu riba homepage: [E] Enseñansa Primario of por tuma contacto cu [M] Ministerio di Enseñansa.
Scroll To Top
