Psicologo pa Maestro
Den cuadro di e concepto di “Teacher Care” y e bienestar di nos educadornan, Minister di Enseñansa ta introduci “Psicologo pa Maestro” na Multidisciplinair Centrum (MdC).
Teacher Care
“Teacher Care” ta un programa special pa maestro, docente y personal di sosten den ensenañsa cu e meta pa brinda ayudo y sosten emocional na e educador den diferente forma. E programa a wordo desaroya door di Ministerio di Enseñansa conhuntamente cu Multidisciplinair Centrum (MdC).
Parti di e programa aki ta inclui un Psicologo pa “Teacher Care” cu consulta na Multidisciplinair Centrum (MdC).
Maestronan di scol y esnan cu ta sostene e scolnan manera IB’er, Remedial Teacher, Trahado Social (pa menciona algun) por ricibi ayudo individual pa varios retonan emocional manera stress, ansha of “burn out”.
E concepto di “Teacher Care” ta un forma pa brinda esnan trahando den ensenañsa mas sosten, ayudo y apoyo, pa asina nan por enfrenta diferente retonan emocional cu por presenta den nan trabou diario na scol of den nan bida personal.
Tabata trahando ya 2 aña riba e concepto aki cu e intencion pa introduci un Psicologo cu ta exclusivamente pa educadornan. Un di e condicionnan tabata cu acceso na e Psicologo mester ta hopi facil, es decir cu no mester bay via un directiva di scol of un dokter.
Yacinthe Anthony ta e Psicologo apunta pa “Teacher Care”. Pa un cita por yama “Teacher Care” na telefon 582-5859 of manda un email na mdc@ea.aw of yacinthe.anthony@ea.aw. Citanan lo wordo atendi na MdC.
Dr. Rosanna van Dijk, coordinador di MdC ta convenci cu “Teacher Care” lo tin un bon acogida. Tin indicacion cu maestro y docentenan den veld mes a pidi pa esaki y p’esey mes Minister di Enseñansa (Hooyboer-Winklaar) a instala “Teacher Care” como un opcion di sosten y ayudo na esanan trahando den ensenañsa.
Info / Contact
Pa mas informacion por busca den e alfabet menu riba homepage:
Scroll To Top
