Matematica
Matematica den e programa multilingual
 |
Den e scol multilingual ta ofrece Matematica na Papiamento di scol preparatorio te klas 4 y ta sigui cu e mesun liña di matematica den klas 5 y 6 na Hulandes. Pa sigura cu e transicion por bay na un manera responsabel y suave, a dicidi di traduci y adapta un metodo existente di Matematica di Hulanda cu yama “Alles telt”.
E metodo aki ta consisti di material pa tur klas di scol preparatorio te cu klas 6 (of grupo 1 te cu 8 den e sistema Hulandes). Na Aruba a traduci y contextualisa e metodo aki pa klas 1 te cu 4 y a publica esaki den cooperacion estrecho cu e editorial cu ta publica e metodo “Alles Telt” na Hulanda. E nomber nobo di e metodo na Papiamento a bira “Conta cu mi”. |
 |
Banda cu e material ta na Papiamento te klas 4, a adapta tambe e contexto den cua ta ofrece e matematica. Asina por ehempel e alumno ta siña conta cu florin Rubiano y no cu euro. Esaki ta haci cu e alumno den klas 1 ta reconoce e monedanan y e papelnan y por relaciona esaki cu e balor cu diferente producto tin na florin.
Di e reaccion di e alumnonan por a nota cu nan ta entusiasma cu e material y ta gusta wak e diferente plachinan cu nan ta reconoce den nan propio bida diario. |
E material di “Conta cu mi” ta hopi amplio y ta consisti di tur manual, buki di alumno, schrift di tarea y material pa por diferencia den klas. Esey kiermen cu alumnonan cu domina e stof por sigui amplia loke nan sa caba y alumnonan cu mester practica un tiki mas ta haya espacio pa haci esaki.
 |
Desde klas 5 e alumnonan lo sigui cu e liña di matematica, haciendo uzo di e mesun material, pero na Hulandes y den e contexto di Hulanda. Aunke cu esaki lo ta algo nobo pa nan, nan lo por haci bon uzo di e base solido cu nan a ricibi cu e mesun metodo aki, pero na Papiamento y den nan propio contexto.
Scroll To Top
