Papiamento
Papiamento den e programa multilingual
Den scol preparatorio e alumno ta cuminsa desaroya e Papiamento cu e conoce caba di cas y di comunidad na un manera mas sistematico. Den forma di tema e alumno ta siña conoce palabranan nobo na Papiamento y nan nificacion y ta cuminsa prepara su mes pa siña lesa y skirbi tambe na Papiamento.
 |
Pa yuda structura e proceso aki ta haci uzo di dos metodo den scol preparatorio esta: “Papiamento na Color” y “Rampa”. Ta midi e progreso di e alumnonan pa mira con nan ta desaroya nan idioma y nan habilidad pa por cuminsa siña lesa.
 |
Desde klas 1 di e scol multilingual e alumno ta sigui desaroya su conocemento di e idioma Papiamento y ta siña lesa na Papiamento haciendo uzo di un metodo cu ta combina desaroyo di idioma y desaroyo di lesamento.
 |
E metodo cu ta uza yama “Baile di Letter”. E metodo aki ta hopi rico na material adicional tambe, manera poster, caha di letter, buki di lesa, liña di letter y mucho mas. Despues di siña tur e letternan na Papiamento, e metodo ta sigui pa ofrece tambe combinacionnan di letter mas avansa. |
Como cu nos tin un ortografia etimologico e metodo ta termina tambe cu lesamento di palabranan adopta cu ta sigui e reglanan di ortografia di e idioma di cua e palabra aki a origina. Asina ya caba e alumno ta familiarisa su mes cu cierto regla di ortografia di Hulandes, Ingles y Spaño.
 |
Na e mesun momento cu e alumno siña lesa e letternan, e ta siña skirbi nan tambe. Pa esaki ta haci uzo di un metodo cu yama “Tribi Skirbi”.
Desde klas 2 te cu klas 6 e alumnonan lo sigui desaroya nan conocemento di Papiamento cu e material di “Festival di Idioma”. E metodo aki ta sigui amplia e conocemento di palabra y nan nificacion na Papiamento. Tambe e ta sigui desaroya e conocemento di structuranan gramatical, reglanan di ortografia mas complica y habilidadnan di idioma manera lesamento comprensivo y composicion di texto.
Scroll To Top
