Programa en conexion cu introduccion di Papiamento den klas 1
Entrante augustus 2024 alumnonan di klas 1 di scol basico lo alfabetisa (siña lesa y skirbi) na Papiamento y lo siña Hulandes den un forma nobo.
E ta cientificamente proba cu si e muchanan forma un base fuerte den nan propio idioma, nan por siña e otro idiomanan hopi mas facil y miho. Ademas, siña lesa y skirbi den idioma materno Papiamento lo haci cu e muchanan lo compronde loke nan ta skirbi y lesa y esaki lo stimula nan habilidadnan di siña en general. Esaki lo ta beneficioso pa e muchanan, mirando cu nan lo bira critico di pensamento y lo ta mas prepara pa duna nan opinion durante les. Ademas di esaki, nan por conecta miho cu nan rais cultural. E muchanan lo sinti mas sigur den nan proceso di siñamento, pasobra esaki ta alinia cu nan idioma materno y nan cultura.
Ministerio di Enseñansa a produci 6 programa pa brinda informacion relaciona cu e introduccion di alfabetisacion na Papiamento.
Programa 2 | Experiencia di maestro y mayor
Maestro y mayor ta conta di nan experencia cu alfabetisacion (siña lesa y skirbi) na Papiamento.
Programa 3 | Preparacion pa e introduccion
Aki por wak e di 3 edicion di e programa informativo caminda a enfoca riba e preparacion di e maestro y cabesante pa e cambio por tuma luga desde augustus 2024.
Programa 4 | Material
Durante programa 4 ta elabora riba e materialnan disponibel pa por siña lesa y skirbi na Papiamento y pa por siña Hulandes den un forma cu ta pas mihor cu nos situacion actual.
Programa 5 | Resultado di un aña di preparacion
Durante programa 5 ta elabora riba e resultadonan di e aña di preparacion pa start cu alfabeticacion (siña lesa y skirbi) na Papiamento y siñamento di Hulandes den un forma nobo.
Programa 6 | Decision pa introduci alfabetisacion na Papiamento
Durante programa 6 Minister di Enseñansa (Endy Croes) ta elabora riba e base pa e decision pa introduci alfabetisacion na Papiamento den scolnan basico entrante augustus 2024. Esaki ta encera cu tur alumno di klas 1 di scol basico lo siña lesa y skirbi na Papiamento prome, y lo siña Hulandes cu un acercamento diferente, pues den un forma nobo cu ta beneficia e alumnonan.
