Modernisacion di ley di enseñansa
Recientemente Minister di Enseñansa (Croes) a informa e Comision di Enseñansa di Parlamento di Aruba di e avancenan di e proyecto di modernisacion di leynan di enseñansa.
Minister Croes a haci esaki hunto cu sr. John Hessen y sra. Arlenne Wever Croes di Dienst Inspectie van het Onderwijs Aruba, director suplente di Departamento di Enseñansa Aruba (DEA) sra. Sheila Maduro, sr. Luutsen de Vries cu ta trek e proyecto aki y sra. Lizara Williams di Directie Wetgeving en Juridische Zaken (DWJZ).
Hunto cu e ekipo, nos a duna un introduccion completo di recomendacion 11 di e “Doorlichting van het Arubaanse Onderwijsbestel”.
Manera ta conoci, despues di pandemia, Gobierno di Aruba a firma un protocol cu Hulanda. Inspeccion di Hulanda y Inspeccion di Aruba a haci un investigacion amplio y a produci un rapport cu diestres (13) recomendacion. Recomendacion 11 ta trata di renobacion di tur ley di enseñansa y traha leynan nobo cu tin mester.
Leynan cu ta bay modernisa ta, entre otro LV di scol preparatorio, LV di scol basico y LV di scol secundario. Banda di esaki, ta bay traha ley nobo pa Enseñansa Profesional (beroepsonderwijs), Enseñansa Superior (Hoger Onderwijs) y Enseñansa Special.
E “Landsverordening Onderwijstoezicht” (LOT) cu ta rigi pa Inspeccion di Enseñansa ta cla y actualmente ta na DWJZ. Den e luna di juni Parlamento di Aruba lo ricibi esaki for di DWJZ pa wordo trata.
Sr. de Vries, kende a skirbi e leynan di enseñansa a reuni cu diferente scol pa nan “input”. E siguiente ley cu ta planifica pa entrega despues di e ley di LOT ta Ley di Enseñansa Profesional. Na luna di mei lo tin e prome “draft” y na luna di juni lo reuni cu tur stakeholder pa nan duna nan “input”.
Minister di Enseñansa (Croes) a reuni cu profesor Luutsen de Vries cu lo permanece na Aruba durante tres (3) siman. Sr. Luutsen de Vries ta contrata pa Ministerio di Enseñansa pa trek e proyecto di modernisacion di leynan di enseñansa cu ta basa riba recomendaciom 11 di e “Doorlichting van het Arubaanse Onderwijsbestel”. Regularmente Sr. Luutsen ta reuni cu Departamento di Enseñansa, Plataforma 1 y Ministerio di Enseñansa pa trata e proyecto di modernisacion di e leynan di enseñansa.
Ley
Fuente
- Isla Online maart 2024
