Paradera lo haya scol secundario
Dia 11 di december ultimo Minister di Enseñansa (Croes) a anuncia den Parlamento di Aruba cu a stipula 6.7 miyon florin pa construi un edificio completamente nobo na Paradera pa scol secundario Juliana School.
Manera ta conoci, Juliana School no tabata den bon condicion y e scol a cera na aña 2016. E team di Juliana School mester a muda pa un otro edificio cu no ta apropia pa e alumnonan haya les. Desde aña pasa a traha un plan pa un proyecto di construccion di Juliana School, pero tabata sperando e fondonan necesario.
Durante e reunion di Presupuesto Supletorio 2023, nos a indica cu danki na e Surplus a haya e fondo necesario pa construi Juliana School y lo inicia cu e proyecto di construccion durante e prome lunanan di aña 2024.
A reuni cu e staf di Juliana School pa involucra nan den e proyecto y trece nan peticionnan dilanti. Durante e reunion Juliana School a opta pa haya un scol completamente innovativo y di e forma aki a diseña e scol. Cu esaki ta cumpliendo cu recomendacion 3 di “Doorlichting van het Arubaanse Onderwijsbestel”, cual ta indica cu mester tin un insfrastructura adecua pa nos enseñansa. Nos ta gradici Gabinete Wever-Croes II cu a traha hopi duro pa pone fondo disponibel pa e proyecto di construccion di Juliana School.
