Nationale Doorstroomtoets
Dialuna dia 22 y 23 di maart 2023 na tur scol basico di Aruba e ‘Nationale Doorstroomtoets’ a tuma luga pa tur mucha den klas 6. Esaki como parti di un maneho pa cu e procedura di fluho pa scol avansa. Dia 1 di juni ultimo e resultadonan a bira conoci.
Alumunonan cu ta sali di scol basico y ta continua nan carera escolar na un scol avansa, ta ricibi un asina yama ‘schooladvies’ pa indica si e carera escolar mester sigui na EPB, MAVO of HAVO/VWO. E conseho aki di scol ta wordo duna, a base di nan rapportnan y desaroyo durante nan carera escolar na scol basico. Den pasado ta alumnonan cu un ‘schooladvies’ pa HAVO/VWO so tawata haci e asina yama ‘toelatingstoets’ pa por drenta Colegio Arubano of Colegio San Nicolas.
A base di e pensamento di ‘equity’ y ‘inclusion’ manera ta describi den e Sustainable Development Goal (SDG) # 4 di Nacionnan Uni (United Nations), e maneho nobo ta duna oportunidad na tur mucha den klas 6 di scol basico pa participa na e ‘nationale doorstroomtoets’, pa asina sostene e ‘schooladvies’.
E base di e maneho ta cu e ‘doorstroomtoets’ ta sostene e ‘schooladvies’.
Si surgi e situacion cu e ‘schooladvies’ ta indica un nivel mas halto cu e ‘doorstroomtoets’, e alumno por drenta un scol di e nivel di e ‘schooladvies’ toch.
Den caso cu ta e ‘doorstroomtoets’ cu ta indica un nivel mas halto cu e ‘schooladvies’, e maneho ta indica cu e alumno por drenta un scol avansa na e nivel cu e ‘doorstroomtoets’ ta indica. E principio ta cu di e 2 instrumentonan, ‘schooladvies’ y ‘doorstroomtoets’, esun cu ta indica e nivel mas halto ta esun cu ta conta pa e alumno por drenta un scol avansa.
Den ley (Landsbesluit dagscholen v.w.o., h.a.v.o., ma.v.o. (AB 1999 No.62) ta indica cu un ‘ontvangende school’, dus e scol avansa, por stipula su mesun criteria pa por drenta e scol, esaki ta algo cu por diferencia pa cada Directiva di Scol. Esey tin como consecuencia cu si un Directiva di Scol pone como criteria cu e schooladvies y doorstroomtoets mester indica e mesun nivel di scol avansa pa por drenta dicho scol, pa ley e Directiva di Scol tin derecho pa haci esaki. E alumno lo mester scoge pa bay un otro scol di un otro Directiva di Scol.
Na Aruba nos conoce 4 Directiva di Scol cu ta ofrece enseñansa pa HAVO/VWO esaki nan ta SVOA (Colegio Arubano), Dienst Publieke Scholen (Colegio Nigel Matthew), SPCOA (Mon Plaisir College) y Stichting Combina (De Schakel College).
Pa MAVO tin SKOA (Colegio San Antonio, La Salle College, Maria College, Filomena College y Colegio San Augustin), DPS (C.G. Abraham de Veer, Ceque College y Juliana School) y SPCOA (Mon Plaisir College).
Pa Enseñansa Profesional Basico nos tin SEPB (EPB San Nicolas y EPB Hato).
E paso di scol basico pa scol avansa ta uno hopi grandi y tin hopi influencia riba e carera escolar di un hoben. Pa e motibo aki ta importante pa e mayornan y e maestronan di scol basico communica bon cu otro y tene cuenta cu e situacion di cada alumno individual, pa asina haci e escogencia cu lo beneficia e alumno mas hopi y cu lo sostene su desaroyo intelectual y social-emocional.
Ministerio di Enseñansa y Departamento di Enseñansa Aruba ta haci uzo di e oportunidad aki pa desea tur alumuno di klas 6 hopi exito cu e ‘nationale doorstroomtoets’ y un carera fructifero na scol secundario.
Info / Contact
Pa mas informacion por contact DEA afdeling Examenbureau
Scroll To Top
