Prome cohort ta obtene “Master of Science in Education”
Recientemente diesun (11) profesional den educacion a finalisa e estudio “Master of Science in Education” (MSE). Si bo kier ta den e siguiente grupo, bo por aplica awo.
Cu sosten di Gobierno di Aruba, Wayne State College den colaboracion cu Instituto Pedagogico Arubano (IPA) a cuminsa na januari 2020 cu e prome cohort (Aruba 01) di e estudio Master of Science in Education (MSE): Curriculum & Instruction – Instructional Leadership. Recientemente e prome cohort a finalisa e estudio. E grupo ta consisti di algun maestro y cabesante di diferente scol basico, docente di enseñansa avanza y un experto den guia di maneho di scol.
Capstone Fair
Dia 5 di april, e 11 profesionalnan den educacion a completa nan estudio di MSE cu un “Capstone Fair”. Nan ‘capstone’ tabata un exposicion den cua nan a presenta y promove e 5 pilarnan (Action Research, Constructivism, Community, Diversity & Reflection) y conceptonan principal di e estudio. Tambe nan a splica con nan ta aplica loke nan a siña den nan practica diario y con nan ta beneficia e alumnonan, maestronan, scol y educacion na Aruba en general.
Pa e ocasion aki e Dean di Wayne State College Dr. Nick Shudak, e coordinador di e estudio di Master Dr. Johanna Barnes y un representante di e Higher Learning Commission Dr. Kim Linduska a bishita Aruba. Nan tabata hopi impresiona pa e profesionalismo y entusiasmo di e 11 profesionalnan aki.
Minister di Enseñansa y Deporte Endy Croes, a felicita e graduadonan y a enfatisa e importancia di e estudio aki pa educacion na Aruba.
Directorado di IPA, y e dos facilitadornan Darrelyn Maduro MSc y Roke Hoen MSc, tambe ta orguyoso di e grupo Aruba 01 y ta felicita e grupo completo cu ta; Charmaine Tromp-Maduro, Emilaine Giel, Franklin Richardson, Nadia Maduro, Regina de Kort, Rachel Werleman, Ruzischka Tromp, Tamara Hamlet, Sherissa Tsu, Swinda de Cuba-Arendsz y Zuleika Fernandes Perna – Silva.
Un grupo nobo ta start na augustus
Despues di e exito aki, Wayne State College y IPA lo cuminsa un sigiuente grupo na augustus benidero. E estudio di MSE tin un duracion di 2 aña.
Abo tambe kier aporta na innovacion den nos enseñansa y exito di nos muchanan/ hobennan? E ora e estudio di MSE ta algo pa bo.
Pa por participa na e estudio di MSE bo mester tin:
- diploma na nivel HBO of WO y ta certifica pa duna les den enseñansa;
- experiencia den enseñansa cu un minimo di tres aña;
- of certificado pedagogico didactico cu minimal 5 aña di experienca riba tereno di enseñansa.
Si bo no ta para dilanti klas actualmente bo lo mester percura pa bo tin acceso na un scol p’asina bo por cumpli cu e tareanan di e estudio.
Inscripcion
Inscripcion ta tuma luga online. Bishita e website di IPA ipaaruba.com, bay na aanmelden y scoge pa ‘Master of Science in Education (MSE)’ y sigui e instruccion.
E ultimo dia pa inscribi pa e estudio aki ta dia 20 di april 2023.
Pa mas informacion por bishita e website di IPA y si tin cualkier pregunta, por tuma contacto cu Studenten Services na 5243100.
Info / Contact
Pa mas informacion por busca den e alfabet menu riba nos pagina principal:
Por tuma contacto cu:
Scroll To Top
