Pronto Aruba lo haya un instituto linguistico nacional
Departamento di Enseñansa Aruba (DEA) a ricibi e bon noticia cu Conseho di Minister a firma un acuerdo di principio (principeakkoord) pa lanta un instituto linguistico nacional.
Esaki a sosode despues cu minister Endy Croes a pidi pa trata e topico aki a base di un nota di conseho di DEA.
Dicon ta importante pa tin un instituto linguistico nacional
E meta principal di e instituto ta pa traha riba cuido y desaroyo di Papiamento. E instituto ta percura tambe pa un maneho di idioma nacional. Papiamento ta herencia cultural di Aruba y idioma materno di mayoria di nos habitantenan. For di 2003, ora cu Papiamento a bira idioma oficial di Aruba, gobierno a indica caba cu e ta desea di stimula uzo di e idioma den diferente sector. Na 2018 tambe Parlamento a aproba diferente mocion, caminda ta pidi pa sigui traha riba ortografia, un diccionario splicativo y conservacion di Papiamento. Pa logra tur esaki, ta necesario pa bin cu un bon planificacion y maneho di idioma. Esaki ta loke e instituto linguistico lo ta encarga cu ne.
E proceso
Na december 2021 DEA a tene un reunion cu minister Croes, den cual e seccion encarga cu idioma, Proyecto Idioma den Enseñansa, a duna un presentacion amplio tocante e topico. Minister Croes di su banda a reconoce e importancia di un instituto. Consecuentemente DEA a entrega un nota di conseho cerca minister Croes, den cual ta describi e meta y e tareanan nucleo di e instituto. Pa yega na e nota a consulta cu Fundacion Lanta Papiamento como stakeholder. Mirando cu ta trata di un instituto pa pais Aruba, minister na su turno a trece e topico dilanti den Conseho di Minister.
E siguiente paso
E acuerdo di principio ta encera cu lo instala un grupo di trabou of comision cu dentro di tres luna lo duna gobierno conseho riba e miho forma pa organisa e instituto. A base di esey lo dicidi tambe bou di cua ministerio esaki lo cay. Mirando e situacion financiero actual, e instituto por lo pronto lo ta ubica na John F. Kennedy Education Center y lo haci uzo di personal existente den gobierno.
Pa medio di esaki DEA ta felicita pueblo di Aruba cu e logro aki, cu ta un bunita regalo pa Dia di Idioma Materno.
Info / Contact
Pa mas informacion por busca den e alfabet menu riba nos pagina principal:
Pa pregunta por tuma contacto cu:
Scroll To Top
