Informacion di vivienda na Hulanda
Den Haag – Arubahuis ta conseha futuro studiantenan for di Aruba: Informa bo mes y tuma accion awo pa logra haya vivienda ora di bay studia na Hulanda.
E potret ta cortesia di Cas di Aruba
Mester inscribi un of dos aña di antemano
Tur aña Arubahuis ta informa riba e importancia pa futuro studiantenan cu kier bay studia na Hulanda pa tuma accion na tempo pa regla e asunto di vivienda. E studiante cu tin pensa di bay studia na Hulanda mester tene cuenta cu mester inscribi pa camber sigur un of dos aña di antemano, dependiendo e ciudad. Esaki ta e mensahe fuerte di e Minister Plenipotenciario na Hulanda (Besaril) na e studiantenan. “Arubahuis ta keda enfatisa riba e importancia di regla vivienda na tempo mirando e scarsedad grandi cu tin den diferente ciudad. Mas tempran bo orienta y inscribi, mas grandi bo chensnan ta pa haya un lugar di biba ora cu bo bin studia na Hulanda. Arubahuis hunto cu e mentornan tin e tarea pa duna e informacion y conseho necesario con por yega na vivienda. Nos ta enfatisa cu e studiante mes ta keda responsabel pa haya y regla su vivienda na Hulanda,” segun minister Besaril.
Kico ta e pasonan cu bo mester tuma
- Orienta riba e opcionnan di vivienda cu tin na e ciudad(nan) y via di scol(nan) unda bo lo kier bay studia.
- Tuma bon nota di e procedura, reglanan y deadlines di cada opcion.
- Tuma accion y inscribi na e instancianan cu ta ofrece vivienda pa studiante. Ta consehabel pa inscribi na mas cu un instancia.
- Si bo no a scoge un ciudad ainda ta consehabel pa inscribi pa vivienda na mas cu un ciudad.
- Keda monitor bo inscripcion. E studiante ta responsabel pa keda controla su inscripcion y reacciona riba vivienda unabes ta asina leu.
Kico ta e opcionnan di vivienda pa studiante na Hulanda?
- Acomodacion pa studiante via di “Woningcorporatie”
- Acomodacion pa studiante via di scol (universidad of hogeschool)
- Acomodacion via di “makelaar” of “bemiddelingsbureau’s”
- Acomodacion via “particuliere aanbieder” riba plataformanan online
- Acomodacion via di famia, conocir of amistad
Pagina “Studia na Hulanda”
Pa mas informacion specifico di cada opcion menciona y detayes pa loke bentaha y desbentaha di cada opcion, studiante y mayornan por acudi na e pagina special [Studia na Hulanda] cu a wordo desaroya door di Departamento di Enseñansa y Arubahuis. E pagina aki ta contene informacion riba tur e topiconan relevante y consehonan importante tocante studia na Hulanda.
Informacion di cada ciudad y regio
Riba e pagina [Studia na Hulanda] e mentornan di Arubahuis a publica informacion specifico di vivienda di cada regio na Hulanda. Cada mentor a inclui e opcionnan mas conoci, pagabel y confiabel cu tin pa vivienda pa studiante den e ciudad/regio. Den e publicacion di cada mentor por haya e links na e diferente websites y tambe splicacion di e procedura, deadlines y den caso cu tin cualkier areglo special pa studiantenan di Caribe of studiantenan cu ta bin di afo.
Webinar “Studentenhuisvesting” hunto cu wonincorporatie DUWO
Studiantenan por wak bek e webinar “Studentenhuisvesting in Nederland” cu Arubahuis a organisa conhuntamente cu woningcorporatie DUWO cu ta maneha e plataforma ROOM.NL. Durante e webinar Arubahuis y DUWO ta duna un splicacion amplio di e diferente opcionnan, ta comparti hopi tips valioso y ta duna conseho riba e diferente aspecto cu mester tene cuenta cune pa evita problema y estafa. Tur futuro studiante, mayornan y interesado por wak e webinar bek aki:
Un bon preparacion ta crucial pa por logra exito na Hulanda. Tin hopi informacion y Arubahuis y mentoren tey pa informa y conseha pero cada studiante ta responsabel pa orienta su mes bon y tuma accion na tempo. Minister Besaril y departamento di Enseñansa di Arubahuis ta desea tur futuro studiante hopi exito cu nan preparacion!
Info / Contact
Pa mas informacion por busca den e alfabet menu:
Por tuma contacto cu:
Scroll To Top
