Convenio pa reconocimento di diploma di America Latina y Caribe
Durante di e Conferencia General di UNESCO cu a tuma luga na Paris dia 15 di november ultimo, Minister di Enseñansa di Aruba (Lampe) a duna sosten completo na Minister di Enseñansa di Corsou (Alcalá-Wallé), pa firma un convenio na nomber di Reino Hulandes. Ta trata aki di e Convenio pa Reconocimento di Estudio, Titulo y Diploma di Enseñansa Superior den America Latina y Caribe.
E convenio aki ta compromete tur e paisnan cu a firma e tratado aki pa adopta tur e medidanan necesario pa reconoce e estudio-, titulo- y diplomanan di e paisnan di Latino America y di Caribe, segun e terminonan stipula den e convenio. Tur e regionnan di UNESCO rond mundo a revisa e convenio cu tabata data 19 di juli 1974. Nan a haci e cambio- y adaptacionnan necesario pa e convenio por cuadra cu e desaroyonan di awendia.
Pa Latino America y Caribe e proseso a cuminsa na juli 2019, na momento cu na Argentina e paisnan miembro y asocia di UNESCO a reuni pa revisa y firma e convenio. Pero na juli ni Aruba ni Corsou no tabatin e autorisacion di Hulanda pa firma.
Obhetivo principal di e convenio aki ta pa reuni personal di educacion superior y evaluadonan di credencial di ambos region pa defini e practicanan cu nan tin en comun. Tambe ta e intencion pa crea posibilidad cu ta aumenta y favorece e mobilidad di profesionalnan riba nivel di Enseñansa Superior di un pais pa otro.
E compromiso politico ta haci un impacto positivo riba e aceptacion di nos academiconan di nos region. E ta engrandece e cooperacion y integracion regional den Latino America y Caribe. Su implementacion den e paisnan cu ta forma parti di e tratado aki lo contribui na: vigila derecho di enseñansa, inclusion y cumpli cu e agenda di SDG-4 y su proposito pa “no laga niun hende atras”.
En total 23 pais a firma e convenio caba na Argentina y awor mas pais a firma e convenio na Paris.
Tabata un momento bunita y historico como cu tabata e prome biaha cu un pais miembro asocia a firma un tratado di UNESCO na nomber di Reino Hulandes. Ta asina cu tanto e minister di Enseñansa di Corsou, como esun di Aruba a haya e apoderacion di Conseho di Minister di Reino pa firma e convenio aki na nomber di Reino Hulandes. Pero segun reglanan di UNESCO ta un pais so por firma. Asina Minister Lampe di Aruba a duna e honor na Minister Marilyn Alcalá-Wallé di Corsou pa e firma na nomber di Reino Hulandes. Tabata un gesto cu tanto e delegacion di Corsou como e delegacion di Hulanda a aprecia masha hopi di Aruba.
Info / Contact
Pa mas informacion por tuma contacto cu Ministerio di Enseñansa
Scroll To Top
