Dia Nacional di Estudio di Scol Arubano Multilingual
Pa hopi decada tin discusionnan ta tuma luga tocante calidad di enseñansa na Aruba. Den e discusionnan un di e condicionnan principal cu a identifica pa por logra hisa e nivel y e resultado di enseñansa, ta un maneho nobo di idioma.
Mayoria di e discusionnan aki a enfoca riba e escogencia di idioma di instruccion y a trata na contesta cua idioma lo mester uza den scol: si ta Papiamento of si ta Hulandes y den e ultimo tempo tambe Ingles. E dilema aki ta sali for di e punto di bista cu den scol lo mester uza un idioma so y cu consecuentemente nos lo mester scoge cua idioma pa uza den scol.
Na aña 2012 a cuminsa cu e Proyecto Scol Multilingual. Manera e palabra “multilingual” mes ta bisa: “multi” ta “mas cu un” y “lengua” ta “idioma”.
Pues un scol multilingual ta un scol cu ta uza y cu ta ofrece mas cu un idioma den scol y den klas. E bunita di e scol multilingual ta cu desde un principio a scoge pa un punto di bista den cua na scol no ta uza un idioma so, pero ta haci uzo di mas cu un idioma. For di e punto di bista aki no ta discuti mas tocante si ta scoge Papiamento of Hulandes of Ingles, pero a scoge pa diseña un scol den cua tin un luga, un funcion y un rol pa tur e cuater idiomanan cu mas nos ta topa den nos comunidad aki na Aruba.
Den e scol multilingual e mucha ta siña Papiamento, Hulandes, Ingles y Spaño, desde kleuter caba. A base di desaroyo y dominio di e idioma materno e mucha ta yega na uza e cuater idiomanan aki pa nan siñamento tambe di e otro materianan.
Dia 14 di October venidero Departamento di Enseñansa Aruba (DEA) den coperacion estrecho cu Centro pa Desaroyo Profesional Continuo (CDPC) di Instituto Pedagogico Arubano (IPA) ta organisa un Dia Nacional di Estudio di Scol Arubano Multilingual (SAM) pa Enseñansa Preparatorio. E cabesantenan y maestronan di e scolnan preparatorio lo participa na e encuentro aki.
Meta di e encuentro ta pa nos compronde e esencia di SAM en general y di e metanan nucleo di idioma y comunicacion en particular mihor, carga esaki y forma un mihor bista di kico esaki ta nifica pa nos actividadnan den Enseñansa Preparatorio.
Durante e dia aki lo tuma luga algun presentacion plenario tocante SAM y e metanan nucleo di Idioma y Comunicacion y diferente “break out sessions.” Den e sesionnan cortico aki lo trata diferente aspecto pedagogico didactico y material didactico practico cu e maestronan por aplica di biaha den klas.
Sr. Carlos Rodriguez Iglesias lo ta orador invita pa e Dia Nacional di Estudio di SAM. Sr. Rodriguez Iglesias ta originalmente di Puerto Rico, pero actualmente e ta biba na Aruba. E ta docente di Ingles na Universidad di Aruba, unda e ta duna les tanto na e Curso di Fundeshi Academico como na e Facultad di Contabilidad, Finansa y Mercadeo. E ta un candidato pa doctorado na Universidad di Puerto Rico y e tin un grado di Maestria di Universidad di Harvard y Universidad di Brandeis na Merca. El a cuminsa duna les na edad di 18 aña como studiante di intercambio na Taiwan. Desde e tempo ey el a enfoca principalmente riba enseñansa di nivel terciario na institucion publico y priva na Puerto Rico. Ademas di les di dominio di Ingles, tambe el a desaroya y duna les na curso destina pa introduci estudio di idioma na no-linguista, p.e. Analisis Comparativo pa Materia Principal den Enseñansa (na Universidad di Puerto Rico) y Mito y Realidad Linguistico (na Universidad di Aruba). Como miembro activo di Sociedad Linguistico Caribense (SCL), Sr. Rodriguez Iglesias ta finalisando su tesis doctoral tocante e caracteristicanan linguistico comun di lenga pidgin y crioyo di base Ingles den Caribe y Pacifico. Su interesnan di investigacion ta inclui adkisicion di idioma, multilingualismo y promocion di conocemento y cooperacion inter-Caribense.
Info / Contact
Pa mas informacion por busca [S] Scol Arubano Multilingual den e alfabet menu riba homepage.
Scroll To Top
