Ki ora ta uza mayusculo den Papiamento?
Pronto Aruba lo conoce un cambio den su sistema di enseñansa. Ta trata di implementacion di Scol Arubano Multilingual (SAM) den tur scol preparatorio y basico na Aruba.
Nos idioma materno Papiamento lo haya un luga CENTRAL den enseñansa di Aruba.
Mirando cu den pasado mayoria di nos no a haya les di Papiamento na scol, hopi di nos no por domina gramatica ni/of ortografia di Papiamento manera mester ta, como tampoco su vocabulario.
Un ehempel di esaki ta e uzo di mayusculo (hoofdletters). Tin diferente regla pa uzo di mayusculo den frase y palabra. Pero con bo sa exactamente ki ora mester uza mayusculo of no?
Pa por guia bo nos a prepara un lista cu e situacionnan na unda cu lo mester uza mayusculo.
Mayusculo na cuminsamento di frase
Ta skirbi cu mayusculo:
E prome letter di e prome palabra di un frase.
Ehempel:
Tur e rumannan ta parce nan mama hopi.
E prome palabra di un frase independiente cu ta para denter di un frase.
Ehempel:
E di cu mi: “Warda un rato.”
E palabra despues di un coma cu ta aparece tras di e saludo na cuminsamento di un carta.
Ehempel:
Apreciabel Señora Croes,
Na nomber di …
Mayusculo despues di signo di lesa
Punto dobel
Ta skirbi cu mayusculo despues di punto dobel: e prome palabra di un frase den estilo directo of un frase completo.
Ehempel:
Su juffrouw a bis’e: “Sigui haci bo best na scol.”
Tres punto
Ta skirbi cu mayusculo ora ta cuminsa cu un tema nobo despues di tres punto cu ta indica un interupcion.
Ehempel:
El a bolbe haya problema cu … E no ta tende, no!
Skirbimento di nomber
- Nomber y fam, nomber di cariño y apodo
- Apelativo cu ta aparece cu un nomber
- Nomber di deidad y nomber di oracion y di scritura santo
- Nomber di planeta y tur e partinan importante di nomber geografico
- Nomber di institucion, negoshi, marca, organisacion etc.
- Nomber geografico y adhetivo, nomber di habitante y nomber di idioma corespondiente
- Nomber di pueblo, nacion y tribu
- E adhetivonan san, santa y santo ora tin nomber di persona para nan tras
- Titulo di obra literario, musical, plastico, visual, audiovisual etc.
Nomber di dignidad y titulo
Forma di cortesia
Como forma di cortesia por skirbi e pronombernan personal ‘bo’ y ‘boso’ y nan pronomber posesivo cu mayusculo.
Ehempel:
E institucion ta pidi Bo(so) pa duna Bo(so) nomber corecto.
Info / Contact
Pa mas informacion por busca [S] Scol Arubano Multilingual den e alfabet menu riba homepage.
Scroll To Top
