IPA a start cu e minor Globalization, Diversity and Multilingualism
Instituto Pedagogico Arubano (IPA) a “kick off” su prome Minor Internacional yama Globalization, Diversity and Multilingualism na Nicolas Store (community museum) na San Nicolas.
 |
E minor aki, cu a keda presenta dia 12 di september 2018, ta pa studiantenan internacional di Caribe, Latino America, Merca y Europa. E ta tuma luga durante e periodo di september 2018 te januari 2019.
E studiantenan di e aña aki a bini principalmente di Hulanda y Aruba, entre otro: e institutonan Hogeschool Rotterdam, Haagse Hogeschool y Universidad di Aruba. E specialisacion di e studiantenan aki ta docente pa scol primario, secundario y pedagogia. |
E programa aki ta concentra riba Globalisacion, Diversidad, Multilingualismo y Enseñansa. Tin un enfoke grandi tambe riba desaroyo sostenibel delinea den e asina yama cuater P’s di sostenibilidad cual ta ‘Planet, People, Profit y Participatory Governance’.
E meta ta pa e studiantenan amplia nan horizonte, cera conoci cu e cultura y sistema di enseñansa di Aruba y haya conocemento didactico pedagogico, investigacion y tambe intercambia conocemento y experiencia.
E programa ta consisti di diferente actividad multidisciplinario unda e studiantenan ta participa na un serie di tayer, facilita pa varios docente di IPA y experto invita, riba diferente tereno manera globalizacion, creolisacion, diversidad, arte y cultura, multilingualismo den enseñansa, sistema y maneho di enseñansa, investigacion y ciudadania. Nan lo haci nan practica na diferente scol basico y scol secundario na Aruba. Banda di esaki, nan lo participa na diferente excursion rond di nos isla.
E mainta tabata hopi exitoso, unda directora general di IPA drs. Marilyn Richardson a yama tur hende bonbini. Den su descurso, el a enfoca riba e concepto di Globalisacion y e hecho cu en realidad nos tur ta interconecta riba un nivel hopi profundo como ser humano. Tambe e echo cu den Caribe, Aruba en particular, nos ta bibando e asina yama ‘global citizenship’ ya prome cu e concepto globalizacion a bira popular.
Banda di esaki tabata tin presentacion y charla di docente di IPA riba tereno di globalisacion, diversidad, arte, baile y cultura. Esnan cu a hiba palabra tabata, entre otro, dr. Paula Kibbelaar, Ingrid Captain MSc, drs. Gregory Richardson, Dyantha Maduro MAE y Lara Kuiperi BFA.
Info / Contact
Pa mas informacion por busca [I] Instituto Pedagogico Arubano (IPA) den e alfabet menu riba homepage of por tuma contacto cu IPA
Scroll To Top
