Introduccion di Scol Arubano Multilingual den enseñansa
E aña aki Minister di Enseñansa, dr. Armando Lampe a anuncia cu Aruba lo conoce un cambio den enseñansa; ta trata di implementacion di Scol Multilingual den tur scol preparatorio y basico na Aruba.
 |
Na aña 2009 a cuminsa cu Proyecto Scol Multilingual (PSML) cu a ofrece e programa multilingual den dos scol preparatorio piloto. Desde augustus 2012 a sigui introduci e programa multilingual den klas 1 di dos scol basico piloto.
Gradualmente a sigui introduci e programa multilingual durante e proximo añanan escolar den klas 2, 3, 4, 5 y entretanto el a yega klas 6 na aña 2017 – 2018. |
Esaki kiermen cu na aña 2018 – 2019 tur klas, cuminsando di scol preparatorio te cu klas 6 di scol primario di e scolnan piloto, ta forma parti di e programa multilingual.
Cu e implementacion di Scol Multilingual den tur scol na Aruba e scolnan piloto lo sigi desaroya prome cu e otro scolnan y nan ta un partner (banda di directivanan (schoolbesturen), CDPC di IPA y DEA) den e implementacion di SAM den e otro scolnan preparatorio y basico.
SAM
Esaki ta e nomber oficial di e programa y e curiculo nobo multilingual den scol primario, cu lo keda implementa.
SAM ta referi na samsam: nos tur ta traha hunto y ta yuda otro. Scol Multilingual ta traha samsam cu comunidad y ta forma parti integral di comunidad. SAM ta referi na e sistema di sam caminda un ta yuda otro. SAM no conoce genero, ma ta enfoca riba e desaroyo di mucha homber y mucha muhe pareu.
E S di SAM ta referi na scol cu ta un entidad primordial pa educacion y evolucion di nos muchanan.
E A di SAM ta referi na e contexto Arubiano saliendo di e identidad di e Arubiano moderno cu ta uno multilingual y multicultural.
E M di SAM ta referi na Multilingual cu ta e refleho di nos comunidada actual.
E logo y mascota di SAM ta un prikichi, e parha nacional di Aruba. Un parha colorido, cu ta combersa y participa activamente.
Ta invita henter pueblo di Aruba pa carga e implementacion di SAM na bienestar di e desaroyo di e muchanan. P’esey a traha un lema cu ta zona “Ban traha samsam cu SAM”.
Diamars 29 di mei 2018, SAM a lansa su campaña di informacion na comunidad di Aruba. E campaña di informacion di SAM tin como meta pa informa y conscientisa Aruba en general tocante implementacion di SAM. E campaña ta encera produccion y distribucion di varios material di informacion e.o. comunicado, website, pagina di Facebook SAM, video y FAQ.
Info / Contact
Pa mas informacion por busca [S] Scol Arubano Multilingual den e alfabet menu riba homepage.
Scroll To Top
