Celebracion Dia Internacional di Lenga Materno
Diaranson dia 21 di februari ta Dia Internacional di Idioma Materno cu UNESCO a proclama na aña 1993. Ta mas cu claro cu Aruba tambe ta celebra e dia aki for di cuminsamento.
Nos tin nos idioma Papiamento, idioma materno di mayoria na Aruba, cu pa hopi tempo a keda hala un banda, pero cu a sa di sobrebibi. Y ta asina cu e aña aki nos ta di fiesta, como cu dia 21 di mei proximo Papiamento ta celebra su di 15 aña como idioma oficial aki na Aruba. P’esey 2018 ta proclama como Aña di Papiamento pa tur hende haya sa mas di Papiamento y haya sa dicon e ta asina importante pa nos.
 |
Idioma ta exigi un posicion importante den comunidad. Esey kiermen den enseñansa tambe, como cu ta proba cu idioma materno ta e herment di mas importante pa uza ora di siña. P’esey nos mester ta orguyoso cu porfin e ta bay haya su luga debido den nos enseñansa. Nos no mester lubida cu cada idioma ta un creacion masha importante di humanidad. Esey ta conta pa nos idioma Papiamento tambe; p’esey ta bunita pa mira con su uzo den comunidad ta crece dia pa dia.
Fundacion Lanta Papiamento (FLP) t’ey pa yuda nos hendenan siña aprecia e idioma bunita aki. Conocemento ta aporta na aprecio y dedicacion. Mescos cu nos ta cuida nos medio ambiente, nos mester cuida nos herencianan cultural-historico tambe, incluso Papiamento. |
Ora un pueblo ta consciente di e balor di su lenga materno, nada no por stroba e idioma aki di ta e idioma cu ta identifica su pais.
Den cuadro di e celebracion aki FLP ta organisa un anochi festivo cu exposion di material di Scol Multilingual, diferente charla interesante, declamacion y musica. Lo cera e anochi cu un brindis ameno.
Fundacion Lanta Papiamento ta invita henter comunidad di Aruba pa asisti na e evento aki.
Un boca bisa otro!! Bini un, bini tur!!
Entrada ta gratis.
Info / Contact
Pa mas informacion por busca den e alfabet menu riba homapage: [P] Papiamento of [P] Proyecto Scol Multilingual por tuma contacto cu Departamento di Enseñansa Aruba (DEA).
Scroll To Top
