Gramatica Morfologia

E trabou aki ta resultado di un proceso di varios aña. Primeramente a desaroya e categorianan di Preposicion y Interheccion, debi cu tabatin poco literatura tocante esakinan na Papiamento. E elaboracion di e dos categorianan aki tabata un trabou preliminar pa un gramatica basico completo. Ta existi algun trabou caba riba e tereno aki, pero esakinan no ta actualisa of nan ta enfoca riba algun aspecto so di gramatica. E obra aki ta trata tur e categorianan di palabra, basa riba e resultadonan di investigacion di Papiamento actual cu e comision a realisa. Cu e meta ey na bista e comision a consulta fructiferamente e obranan cu ta aparece den e bibliografia.

Intencion di e manual aki ta pa e lesado adkiri conocemento basico di gramatica di Papiamento. E buki aki ta trata principalmente categoria di palabra. Di e manera aki e lesado por perfecciona su conocemento di e idioma cu e ta uza como vehiculo di comunicacion. Na un manera eficiente y lihe e lesado por conoce e reglanan di e idioma y por soluciona duda specifico tocante uzo corecto di Papiamento. Pa e motibo ey a trata e categorianan na un manera accesibel y a evita uza un idioma hopi tecnico. E manual aki ta dirigi no solamente na maestro, sino tambe na studiante, na profesional di diferente disciplina y generalmente na cualkier persona interesa pa haya un bon conocemento di gramatica di Papiamento.

A dicidi di parti e Manual di Gramatica di Papiamento den dos tomo. E tomo aki ta trata categoria di palabra y e siguiente tomo lo trata sintaxis di Papiamento. Di e ultimo aki mester desaroya su contenido ainda.

E comision cu a elabora e Manual di Gramatica di Papiamento Morfologia a consisti di e siguiente personanan: Etley Lasten, Selvia Lumenier, Juan Maduro, Filomena Schwengle, Elvia Solognier- Croes, Ramon Todd Dandaré y Pedro Velásquez.

Papiamento Gramatica Morfologia