Studentenhuisvesting Brabant y Limburg
Den Haag – Arubahuis ta brinda informacion di vivienda pa studiantenan cu kier studia na Hulanda den regio Brabant y Limburg.
Studentenhuisvesting regio’s Noord-Brabant en Limburg
• Provincie Noord-Brabant: Breda, Eindhoven, Tilburg, Den Bosch
• Provincie Limburg: Maastricht, Sittard, Heerlen y Venlo
Mentor di Arubahuis sra. Rasnaly Carti ta brinda informacion di vivienda pa studiantenan cu kier studia na Hulanda den regio Brabant (Tilburg, Breda, Den Bosch, Eindhoven) of Limburg (Maastricht, Sittard, Heerlen, Venlo).
Ta duna informacion necesario con pa yega na un camber a base di un bon contract, cu ta pagabel y pa termino largo durante e estudio. Ta informa over e websitenan pa inscribi y busca vivienda. E studiante na Aruba ta keda responsabel pa su vivienda na Hulanda y pa e consecuencianan si esey no ta bon regla.
Un apelacion grandi ta pa mayornan y scolnan yuda y tira un bista trempan riba e hoben studiante den su preparacion total pa bay studia na Hulanda. Tambe den su buscamento y escogencianan. Si na augustus/september e studiante kier cuminsa cu su opleiding den tur trankilidad y sin stress, su asuntonan mester keda regla prome. Tur cos ta depende di un bon preparacion y na tempo!
E situacion di vivienda pa studiante ta dificil y no ta mira muchu cambio pa e siguiente aña(nan). Tin hopi scarcedad di camber y prijsnan di camber a subi. Exigencianan di instancianan a bira mas severo. Tin “wachttijden” largo pa camber.
BSN
Pa por inscribi na un gemeente mester tin e.o. un “inschrijfadres” via un huurcontract di un camber of via un “toestemmingsbrief” pa “inwoning”.
Cu esey gemeente ta dunabo e BSN (Burger Service Nummer) cu ta necesario pa regla tur asunto prome cu scol cuminsa: Banco, DigiD, DUO, Ov-kaart etc. E BSN tambe por tarda y por strobabo di caba di regla bo asuntonan prome cu scol cuminsa.
Inscribi na tempo
Pa logra haya un vivienda, un camber, bo mester ta inscribi na tempo, por lo menos dos (2) of tres (3) aña adelanta na un “woningcorporatie” cu tin un “afdeling” pa studiante (“studentenhuisvesting”).
Inscribi alvast ora bo ta den:
- 3e of 4e HAVO;
- 4e of 5e VWO;
- 2e of 3e EPI.
Asina bo ta acumula “inschrijftijd”. Tin inseguridad riba e mercado di camber. Orienta y planea na tempo bo futuro como studiante.
Studiante cu yiu
Studiantenan cu ta bin cu un of mas yiu no por haya of biba den un camber of studio. Na Hulanda ta exigi mas espacio pa e famia. E yiu(nan) mester tin nan mesun camber! Pa haya un lugar adecuado ta exigi hopi tempo di inscripcion pa cas y placa.
Duda?
Si ta duda riba cua “opleiding” of ciudad na Hulanda, inscribi na diferente website, varios ta gratis, y despues bo ta haci escogencia.
Postcode
Si mester yena postcode riba e “inschrijfformulier” por yena un postcode ficticio pa Aruba, por ehempel 1111 AB.
Camber via scol
Ora scoge un estudio y un scol, por check si tin posibilidad pa haya un camber via e scol. Mas tanto nan tin camber pa un (1) aña y muebla. Tene na cuenta si cu na e mesun momento bo mester ta inscribi tambe na un “studentenhuisvestingsbureau” y na tempo paso despues di e prome aña bo mester tin un otro camber.
Makelaar
Via un makelaar den mayoria caso bo mester ta presente pa regla e camber. E prijsnan via makelaar ta hopi caro y tin scarsedad di vivienda den juli y augustus. Reglamento y pagamento for di Aruba pa un vivienda via un makelaar of sector priva lo keda un risico di placa y seguridad di bo cas y vecindario! Mayoria makelaar no ta accepta tampoco mas pa mayornan para borg for di Aruba.
Conseho
Mi preferencia y conseho ta pa regla un camber via un “woningcorporatie” cu su “afdeling” di “studentenhuisvesting”. Pero mester inscribi trempan.
Exigencia personal mester ta den balans. Cuminsa simpel, chikito y sea cauteloso cu bo placa y cu tur informacion. E meta ta bo estudio! Tenebo mes na e contract cu bo a firma y citanan cu bo a haci.
Door cu e distancianan entre Tilburg, Breda, Den Bosch y Eindhoven no ta grandi e studiante por biba den un ciudad y studia den un otro. Esey ta haci e posibilidad mas grandi pa haya camber.
Igualmente ta e caso den Limburg entre Maastricht, Sittard y Heerlen. Despues por move pa e ciudad caminda ta studia. Check e sitenan y tuma bon nota di e proceduranan, e reglanan y deadlines.
Importante
E mentor kier avisa tambe cu tin studiante cu a paga placa na persona of instancianan pa regla un camber of studio pa nan na Hulanda y despues a resulta cu no a regla of no por a regla nada.
Tene cuenta tambe cu pagamento pa ayudo cu yenamento di formulario di DUO. Check pa ayudo na cas cu bo mayornan of na scol of cu DUO mes.
Tambe mester tene cuidou cu estafadornan! Pa esnan cu kier huur via Marktplaats, Facebook, famia, friends of conocirnan, semper tuma contacto prome cu e verhuurder y informa e posibilidadnan pa inscribi na e adres via gemeente. Sin incripcion legal na e adres no por inscribi na gemeente. Na Hulanda ta obligatorio pa ta inscribi na e adres unda e studiante ta biba, pa bo por mantene bo BSN nummer. Si bo no por inscribi na e adres unda bo ta biba esey kiermen cu probablemente e camber ta wordo verhuurd ilegalmente (“onderverhuur”).
Websites pa busca vivienda na Regio Brabant
*Disclaimer:
Arubahuis no ta responsabel pa e contenido y (posibel) erornan publica riba e websitenan menciona.
Tilburg
Breda
Den Bosch
Eindhoven
Websites pa busca vivienda na Regio Limburg
Maastricht
Sittard
Heerlen
Venlo
Disclaimer
Departamento di Enseñansa Aruba ni Arubahuis no ta responsabel pa e contenido y (posiblemente) errornan publica riba e websitenan menciona.
Contact Mentor
Pa mas informacion of pa cualkier pregunta over di biba y studia den regio Brabant (Tilburg, Breda, Den Bosch, Eindhoven) y Limburg (Maastricht, Sittard, Heerlen, Venlo), por tuma contacto cu:
Mentor Rasnaly Carti
Email: r.carti-mentor@arubahuis.nl
Tel / Whatsapp: 0031 6 255 600 41
Por tuma contact tambe direct cu e instancianan menciona tambe si tin cualkier pregunta.
Info / Contact
Pa mas informacion por busca den e alfabet menu:
Por tuma contacto cu:
Scroll To Top
