Na inicio di aña 2018 Minister di Enseñansa, dr. Armando Lampe a anuncia cu Aruba lo conoce un cambio den enseñansa; ta trata di implementacion di e programa y e curiculo multilingual den tur scol preparatorio y basico na Aruba.
Scol Arubano Multilingual (SAM) ta e nomber oficial di e programa y e curiculo nobo multilingual cu lo keda implementa den scol primario entrante aña escolar 2018-2019.
Scol Multilingual ta un sistema di educacion indispensabel pa Aruba, teniendo cuenta cu e comunidad di Aruba ta multilingual. Multilingualismo ta un rikesa y un oportunidad cu nos comunidad ta brinda cu lo mester tin su refleho tambe den scol. Un idioma ta manera un yabi cu ta habri bo posibilidad pa por comunica y asina desaroya bo mes. Pues mas idioma bo siña, mas yabi bo tin pa por desaroya bo mes den e mundo di awe. Un persona multilingual tin un capacidad mas grandi di compronde loke ta pasa rond di dje, pasobra e por combina su conocemento di mas cu un idioma cu otro.
Cifranan di Censo (2010) ta mustra cu gran mayoria di nos poblacion ta papia Papiamento cu otro na cas (casi 70%), sigui pa 14% di nos poblacion cu ta papia Spaño, 7% cu ta papia Ingles y 6% cu ta papia Hulandes cu otro na cas.
Aunke cu desde aña 2003 Papiamento y Hulandes ta e idiomanan oficial na Aruba, nos por mira cu nos yiunan tin un habilidad tremendo di siña Ingles y Spaño den nan bida diario, sin cu nan a haya les di e idiomanan aki na scol.
Un persona multilingual ta transferi loke el a siña den un idioma pa e otro idiomanan. Esaki ta haci cu un base fuerte den un idioma cu e alumno conoce bon tin su beneficio pa siñamento di otro idioma cu e alumno tin mas dificultad cu ne. Asina por ehempel un bon dominio di Papiamento, cu ta un idioma cu e alumno ta scucha cu mas frecuencia, ta un condicion pa un bon dominio di Hulandes, cu ta un idioma menos conoci pa mayoria di nos muchanan.
Na aña 2018 – 2019 tur klas, cuminsando di scol preparatorio te cu klas 6 di scol primario di e scolnan piloto, lo forma parti di e programa multilingual. Cu e implementacion di Scol Multilingual den tur scol na Aruba e scolnan piloto lo sigi desaroya prome cu e otro scolnan y nan ta un partner (banda di directivanan (schoolbesturen), CDPC di IPA y DEA) den e implementacion di SAM den e otro scolnan preparatorio y basico.
Den fin di mei y den juni lo tin merdianan di informacion pa tur e scolnan primario na Aruba. Tur scol lo ta drentando e fase di orientacion. Na 2018-2019 ta continua cu e scolnan y e maestronan ofreciendo trayectonan pa prepara nan mes riba e cambionan y pa cera conoci cu e programa completo, e condicionnan esencial y e sosten cu lo duna pa realisa e exito di e programa na nan scol y den klas. Na 2019-2020 e kleuternan mas chikito lo cuminsa implementa. Siguientemente e kleuternan (entretanto) grandi na 2020-2021 y na 2021-2022 e eerste klasnan, etc. Pues e programa lo cuminsa prome na e scolnan preparatorio y lo bay conhuntamente cu e alumnonan na un klas mas halto.
Di e idiomanan stranhero, Hulandes ta esun cu ta haya mas ora di dedicacion for di trempan. E motibo pa esaki ta cu pa gran mayoria (94%) di nos muchanan, Hulandes ta un idioma cu casi nan no ta tende pafo di scol.
Aunke cu e muchanan ta siña Hulandes den un forma di wega, cu hopi actividad y material concreto, ta ofrece un structura y un secuencia sistematico den e lesnan di Hulandes. Asina ta percura pa por logra e meta cu tur alumno por tin un vocabulario di mas di mil palabra na final di scol preparatorio. Despues ta sigui amplia e vocabulario aki den scol basico. Ta ofrece Hulandes den un ambiente rico di estimulo y den forma interactivo cu ta duna e alumno e oportunidad di desaroya un actitud positivo pa e idioma pa por logra haya conocemento ta hopi mas fuerte. Aki ta premira cu e muchanan den un sistema multilingual lo bay sobre sali na un scol secundario.
Ta haciendo diferente investigacionnan pa cu e aspecto aki. Hulandes pa hopi tempo tabata un punto di preocupacion. Den e sistema regular ya pa hopi aña ta nota muchanan tin dificultad cu e Hulandes. A haci investigacion pa wak si tin diferencia den e dominio di idioma y a constata cu e nivel di Hulandes ta mescos. E herment fuerte serca e muchannan den e scolnan multilingual ta nan habilidadad di uza tur e idiomanan.
E maestronan ta hayando profesionalisacion y coaching continuo pa nan por ofrece e programa multilingual. IPA su Centro pa desaroyo Profesional y Continuo (CDPC) ta ofrece esaki.
Alabes tin varios metodonan disponibel pa por ofrece Papiamento di nivel. Tambe tin material di sosten disponibel caba e.o. Vocabulario Ortografico y Manual di Gramatica di Papiamento “categoria di palabra” y ta sigui traha mas material di sosten pa Papiamento, manera Manual di Gramatica di Papiamento “formacion di frase”.
Tin vakdocenten den e klasnan mas halto kaba (5 + 6). E idea ta mescos cu na un scol piloto multilingual, pa e vakdocenten aki duna les den klas 1-6.
Den pasado a traduci e cito toets na Papiamento, esey kiermen cu un version na Papiamento ta disponibel.
Pa e muchanan cu tin idioma Hulandes como idioma materno tin e opcion pa scoge un scol multilingual cu tin Hulandes como idioma di instruccion, mirando cu Hulandes oficialmente ta un idioma di minoria na Aruba. E cantidad di scolnan multilingual caminda ta uza Hulandes como idioma di instruccion ta limita, paso e condicion di mas importante pa uza Hulandes como idioma di instruccion na un scol multilingual ta cu e mayoria di alumno na e scol ey ta papia Hulandes na cas (b) e cantidad di alumno cu ta papia Hulandes na Aruba ta relativamente chikito. Actualmente un scol so ta cumpli cu e exigencia aki cu ta un scol di SPCOA. Segun cu haya un miho bista di e necesidadnan di e demas alumnonan cu ta papia Hulandes y nan mayornan, lo stipula mas aleu con lo bay provee e necesidad ey.
