Muchanan di Aruba a participa na Hour of Code

December 13, 2016

Recientemente, Biblioteca Nacional Aruba, SETAR, Aruba Digital Systems y Departamento di Enseñansa a ehecuta “Hour of Code” hunto cu diferente scol na Aruba. Ta trata aki di un proyecto organisa rond mundo cu ta introduci e mucha na “coding” pa stimula nan interes den areanan cientifico como tambe di IT.

“E idea tras di e proyecto aki ta pa lanta e interes di e muchanan for di un edad hopi jong pa sigui nan estudio den e area cientifico como tambe di computer”, asina Minister di Enseñansa Michelle Hooyboer-Winklaar a splica. “Coding kisas ta mustra algo hopi complica ora nan ta hunga wega, ora nan ta mira video of cualkier cos online, pero e realidad ta cu e ta algo masha facil si bo cuminsa haci’e na un forma di un building block. Esey ta henter e proyecto. Nan a yam’e Hour of Code pasobra e idea ta cu den un ora di tempo tin varios ehercicio cu por wordo haci cu ta splica kico coding ta precisamente y e ta yuda muchanan di eerste klas te cu scolnan avansa na siña con pa haci esaki, obviamente a base di e nivel cu nan ta aden”, asina e mandatario a bisa.

“Mirando con e muchanan awe na Princess Amalia ta ehecutando e proyecto tin cu bisa cu di parti di Ministerio di Enseñansa e tin nos sosten completo. Nos ta hopi contento cu e iniciativa aki. E grupo cu a cuminsa cu e proyecto aña pasa awe ta mira un crecemento total,” el a agrega.

Hour of Code ta un proyecto cu a cuminsa na aña 2015. SETAR NV hunto cu Aruba Digital Systems NV y Biblioteca Nacional Aruba a ehecuta esaki hunto cu Mon Plaisir Basisschool. E aña aki e grupo a sinta hunto atrobe pa haci’e mas grandi. Asina a bati na porta di Ministerio di Enseñansa y Departamento di Enseñansa pa asina haya mas scol pa participa.

“Pakico nos ta kere cu e ta importante, ta pasobra nos ta mira cu no ta hopi hoben ta scoge e vaknan aki ainda ora cu nan yega asina leu pa bay studia afo. Esaki tin di haber hopi biaha cu cuanto biaha nan ta wordo exponi na dje. E idea ta expone mas mucha, mas tanto mucha muhenan, cu nos ta mira cu masha poco di nan ta scoge esaki como estudio. E idea ta pa present’e mas y mas t’e pa e bira algo cu for di comienso di nan formacion ya caba nan tin’e den nan mundo. Asina nos ta pone e base pa ora nan bira mas grandi nan por haci e escogencia corecto ora nan bay sigui studia”, Minister Hooyboer-Winklaar a amplia.

“E ta un tremendo iniciativa pa presente for di un edad hopi jong na un manera hopi leuk cu nan ta piki di biaha y cu speransa e ta algo cu lo por continua y wordo hinca den un curiculo tambe” e mandatario a agrega.

Manager di Aruba Digital Systems NV, Viviana Carraca ta bisa cu den e siman cu a pasa ya caba nan tabatin 1.700 studiante cu a participa na Hour of Code, cu ta un ora di conscientisacion di ciencia computarisa den klas. E ta cuminsa for di edadnan hopi jong, for di kleuter te cu scolnan basico y ta sigui den educacion avansa.

El a sigui splica cu e proyecto basicamente ta con bo ta hinca ciencia di computacion den les. “Con bo ta haci’e parti di e les treciendo conscientisacion,” e ta agrega.

“Ciencia di computacion ta den tur industria, absolutamente tur industria. Esey ta e futuro. Aki 10 aña ta bay tin un buraco hopi grandi di trabounan den e tipo di industria aki cu tin di haber cu agricultura, medicina, moda, entretenimento, kico cu bo pensa ciencia di computacion tin di haber cune. Nos ta den un mundo tecnologico. Anto esey nos kier cuminsa conscientisa e importancia cu tin den dje,” e ta splica. “Ora bo scoge un estudio, bo ta scoge algo cu en realidad ta bay duna Bo un bon trabou den futuro cu Bo por wordo hopi bon paga. Esey ta loke nos kier pa nan sa”, e ta splica un poco mas.

Cabesante di Princess Amalia Basisschool, Roelien Hoffman a bisa cu for di momento cu nan a bay e anochi di informacion na universidad nan a keda impresiona y mesora nan a bay bek nan seno y presenta e proyecto Hour of Code na tur nan coleganan cu na nan turno a keda entusiasma mescos cu nan.

“Pa prome biaha henter un scol a participa. Ora cu nos a yama mr. Scholing na Biblioteca Nacional e la spanta un rato mirando cu tabata papia di 320 mucha, pero cu hopi entusiasmo a hinca e plan den otro y henter e scol a logra participa” .

E ta sigui splica cu e muchanan di tweede te cu zesde klas a bay Biblioteca Nacional unda cu nan a haci uzo di e salanan di computer pa participa y e muchanan di eerste a haya nan turno riba dialuna den klas unda cu nan a haci nan parti riba papel.

“Nos kier yama danki na tur hende cu a haci esaki posibel. Nos a haya hopi boluntario cu a yuda siman pasa. Nan ta di diferente instancianan manera universidad, SETAR NV, Aruba Digital Systems NV, Peter Scholing di Biblioteca Nacional cu a yuda mi coordina esaki pasobra berdad e tabata un organisacion un tiki pisa y Departamento di Enseñansa unda cu nos a pidi un afwijking di rooster pa por logra esaki,” e ta conclui.

Tur hende ta cla pa otro aña?

E deseo ta pa introduci Hour of Code na tur scol na Aruba.

Mas informacion

Pa mas informacion por acudi na e facebook page Hour of Code Aruba | @HOCARUBA. Aki tambe por haya un formulario pa registra como voluntario pa asisti e proyecto. Tambe por comunica via email adres hourofcodearuba@gmail.com.